De Tsjerne. Jaargang 15

[p. 264]

Frysk en frjemd:

Yn Fryslan

‘Toen ik in 1929 mijn leeszaalbetrekking in Sneek aanvaardde, vond ik Friesland terug als een ingesluimerde provincie. Mijn boos voorgevoel, dat mij daar een periode van nieuwe vereenzaming en geestelijke eentonigheid te wachten stond, werd volkomen bewaarheid.’ Sa fornijt de skriuwer Theun de Vries (berne to Feanwâlden; skriuwer û.o. fan Fryske Stilistyk (1937) en fan gâns in rige hollânske romans dêr't Stiefmoeder Aarde ien fan de bikendste fan is) yn it july-nûmer fan De Gids dêr't er syn letterkundige memoires yn publisearret ûnder de titel Meesters en Vrienden. De tredde ôflevering, wijd oan syn Snitser lêssealjierren, draecht as ûndertitel Verloren vaderland. De Vries makket dêryn û.o. gewach fan syn omgong mei jongere Fryske skriuwers yn dy dagen: J.H. Brouwer en Gerben Brouwer, fan hwa't er, sa seit de skriuwer, goede freonskip ûnderfoun hat, lykas er ek yn it formidden fan it tydskrift De Holder (redaksje J.H. Brouwer en R.P. Sybesma) mei iepen earmen ûntfongen waerd. ‘Verbondenheid, verwantschap’ lykwols fielde er net; de omgong mei J.C. Bloem, Clara Bloem-Eggink dy't doe yn Sint-Nyk wennen en mei Slauerhoff dy't er dêr mette soe duorjender wêze, alteast mear bliuwende yndruk op him meitsje.

J.H. Brouwer 60 jier

Ta gelegenheit fan syn sechtichste jierdei is oan prof. dr. Jelle Hindriks Brouwer út namme fan in ynternasionael earekomité in greate bundel Fryske Stúdzjes (Van Gorcum, Assen) oanbean mei bydragen fan mear as fyftich filologen, Friezen sawol as net-Friezen. Yn mear as ien krante-artikel dat oan de 60ste jierdei ek fan de dichter Jelle Brouwer wijd waerd is de winsk útsprutsen, syn beide bundels De Gouden Ure en In string fersen soene jitris yn ien bân útjown wurde. Dr. A. Wadman ljochte dy winsk ta lykas folget: ‘It soe bliken dwaen kinne, dat oan 'e iene kant dit wurk wol tige sterk oan syn tiid fan ûntstean boun is, de tweintiger en tritiger jierren, mei it hichtepunt en de neibloei fan de Jongfryske biweging - dus biheind fan sfear en bidoeling - mar it soe sûnder mis in geve persoanlikheit, in fyn ynlein wurdkunstner en in knap technikus oan it ljocht bringe, en boppedat - it soe ek it foar de jongerein en gâns oaren al frijhwat legendarysk wurden byld fan de Jongfryske tiid forskerpje en folsleiner meitsje kinne.’

Yn Hollan

De útjowerij Nijgh en Van Ditmar N.V. yn Den Haech hat in treflik inisiatyf nommen troch in bundel Fryske forhalen yn Hollânske oersetting oan to kundigjen, dêr't suver alle hjoeddeiske prozaïsten fan hwat bitsjutting yn fortsjintwurdige binne. Samlers binne D.A. Tamminga en dr. Anne Wadman dy't ek de oersetting op har nomd hawwe. De bundel sil forskine ta gelegenheit fan it sechde lustrum fan it Frysk Studinte Selskip Redbad to Utert dy't de útjowerij hjirfoar oanspand hat, en wol yn de lustrumwike fan 21-28 oktober. De bundel komt as in great formaet pocketboek yn in oplage fan likernôch 3000 eksimplaren yn de hannel ûnder de titel Friese verhalen in het Nederlands.

Yn Amearika

Neffens in meidieling fan prof. dr. B. Fridsma yn in artikel fan syn hân yn it moanneblêd De Strikel (july 1960) is de Amerikaenske filosoof Marten ten Hoor (berne 1890 to Frjentsjer) fan doel om Frysk literair wurk oer to setten yn it Ingelsk. Dr. ten Hoor skôget de lêste jierren gauris Fryske útjeften yn it ynternasionale tydskrift Books Abroad.

FREARK DAM