De Tsjerne. Jaargang 15

[p. 160]

Frysk en frjemd:

‘Weerzien der meesters’

De Rely Jorritsmapriisfraech hat ek foar dit jier gjin ‘nije talinten’ oan it ljocht brocht. Of it moast dan wêze dat de (iennichste) priis foar poëzij yn dit ramt ditkear takend is oan Gerrit Mulder dy't by myn witten oant nou ta allinne Relyproaza skreaun hat. De prizen foar koarte forhalen wiene ek nou wer foar twa goede bikenden: Geart Jonkman (De leffert gean de kleuren op en del) en Paulus Akkerman (Ien misstap). De prizen sille útrikt wurde op it Mantgumer gemeentehûs op 28 maeije o.s.

KFFB-nijs

De Kristlik Fryske Folksbibleteek hat meidield dat hja kommende hjerst in nije roman fan G. Spaanderman-Wielinga, Flewielene Fearren, útjaen sil. Fan deselde skriuwster forskynde in jiermennich lyn har earste roman It goudene ûleboerd. Yn krantebirjochten is fierders meidield, mefrou Spaanderman is ek toset oer in roman dy't yn Harns spilet, de stêd dêr't hja in diel jierren wenne hat.

Iepenlofttoaniel

De ‘sprieding’ (?) fan iepenlofttheaters yn Fryslân - foar it neist noch net alhiel folslein - jowt yn elk gefal nije kânsen oan skriuwers dy't op dit mêd hwat kinne of wolle. Sa hat Piter Terpstra opdracht krige ta it skriuwen fan in toanielstik foar it iepenlofttoaniel (notaristún) to Jorwert; yn Sondel sil dit jier in nij, histoarysk stik fan Barend van der Veen spile wurde. De nijste oanwinst, Burgum, komt ûnder regy fan de skriuwer mei Mynhear de presidint fan Jef van der Heijden (forline winter troch studinten yn Wageningen opfierd); it stik is oerset troch Johannes Spyksma. It ‘âldste’ iepenlofttheater, dat fan Beetstersweach, bringt op 18 juny de première fan Dürrenmatts fragmintaryske komeedzje In ingel yn Babylon.

‘Friezen in Frankrijk’

Fan de Drachtster journalist Rink van der Velde sil noch dit jier by de útjowerij Bosch en Keuning N.V. to Baarn (yn de s.n. Opgangserie) in Hollânske roman Friezen in Frankrijk útkomme. De skriuwer hat dêr foar in part syn eigen erfaringen yn dat lân yn forarbeide.

Koart nijs

Ta gelegenheit fan de 70ste jierdei fan de Eastfryske skriuwster Wilhelmine Siefkes binne har samle fersen forskynd ûnder de titel Tüschen Saat un Seise. * De kommisje dy't ‘klassike’ berneboeken yn it Frysk útjaen litte wol (dêrfoar riedt in Stifting foar jongereinlektuer) sil yn 1961 útein sette mei in forfrysking fan Sans famille fan Hector Malot. * It moanneblêd De Nieuwe Stem hat in great nûmer (febrewaris 1960) alhiel wijd oan Spanje. Foaroansteande emigranten hawwe der oan meiwurke; de supervisy hie de Grinzer Hispanist dr. G.J. Geers. * Rowohlt Verlag yn Hamburg sil fan 't hjerst de samle wurken fan Kurt Tucholsky útjaen, soks ta gelegenheit fan it feit dat dizze greate Dútske skriuwer 25 jier lyn, yn frijwillige ballingskip, forstoarn is.

FREARK DAM