De Tsjerne. Jaargang 15

Frysk en frjemd:

Krekt oer de drompel

In krie kin noch sa fleane, it is altyd ôfwachtsjen. Dat hat bliken dien oan it rapport fan de jury fan de romanpriisfraech fan de KFFB. Dêr wiene moai hwat hânskriften foar ynkommen, mar it koe allinne mar in twadde priis lije. Dy wie foar ds. Th. Kuiper dy't mei syn roman De wei dy't ik net gean wol dus net al to rejael oer 'e drompel kommen is. De KFFB sil fierders yn boekfoarm de Fryske oersetting fan in detektiveroman fan Conan Doyle (fortaler Inne de Jong) publisearje.

[p. 32]

Fuort, swarte!

De Fryske Bibleteek bringt dit jier twa nije romans: fan Hein Faber in Makkumer boek ûnder de titel Doarp oan sé, fan Paulus Akkerman in forhael dat earder as feuilleton yn Frysk en Frij publisearre is. Dizze foriening hat nou oer de 1200 leden, foaral troch tadwaen fan it bistjûr mei as koprinder foarsitter Wouter Zwart.

Gysbert-bitinking 1966

It komité dat de bitinking fan de 300ste stjerdei fan Gysbert Japiks tariedt, wurket op it stuit plannen út. Der wurdt tocht oer in boek dat de dichter yn it ramt fan syn tiid set, mar ek is it doel, in wurkje oer de greate Boalserter dichter gear to stallen dat û.o. ornearre is foar it middelber ûnderwiis. It sil in karlêzing bifetsje en fierders ek gâns yllustraesjes jaen. Mei in auteur wurdt rieplachte oer in biografyske roman oer Gysbert Japiks. Der wurdt in aksje taret foar it oprjochtsjen fan in stânbyld foar de dichter yn Boalsert. De tiid fan bitinking is tonearsten steld op septimber '66.

Portrettegalerij

It Boun fan Fryske kunstners hat oan it provinsiael bistjûr in portret oanbean fan de nestor fan de Fryske dichters, dr. Obe Postma, skildere troch Dick Osinga. Prof. dr. J.H. Brouwer hat by dy gelegenheit in ynlieding hâlden oer it wurk fan dr. Postma. It leit yn 'e bidoeling, yn 'e takomst ek fan oare forneamde Fryske kunstners portretten meitsje to litten, dy't ornearre binne foar it nije gebou fan de Provinsiale Biblioteek oan it Aldehoustsjerkhôf to Ljouwert.

Opbou yn in utbou

It Frysk Letterkundich Museum en Dokumintaesjesintrum, ûnderbrocht yn de nije útbou fan it Coulonhûs to Ljouwert, hat dizze moanne it bilangstellende publyk foar de earste kear yn de gelegenheit steld, mei dizze nije ynstelling yn 'e kunde to kommen. It museum hat him ta doel steld, hânskriften, printkladden mei oantekeningen fan de skriuwer, brieven fan en oer letterkundigen, foto's en oare ôfbyldingen fan skriuwers, lûdbannen, kranteknipsels ensfh. to sammeljen. It bistjûr wurdt foarme troch de neikommende persoanen: prof. dr. J.H. Brouwer, Freark Dam, dr. Sj. Douma, juffer B. Fokkema, E.B. Folkertsma, drs. G.A.G. Meerburg, D. Miedema, J. Piebenga, dr. Y. Poortinga, D.A. Tamminga, notaris B. Tuinstra. De hear M.K. Scholten, amtner oan de Provinsiale Biblioteek sil - tonearsten foar in biskate tiid yn 'e wike - oan de deistige gong fan saken lieding jaen. It sintrum ûnderhâldt kontakt mei soartgelikense, al bisteande ynstellingen yn Den Haech en yn Antwerpen.

Studintikoze unmacht?

De haedredaksje fan it tydskrift Fryslân Oerein!, it orgaen fan de Federaesje fan Fryske Studinteforienings dielt yn it desimber-nûmer '59 mei, dat op de troch har útskreaune literaire priisfraech hast gjin wurk fan wearde ynkommen is. De redaksje hat gjin frijmoedichheit fine kinnen om foar hwat ynstjûrd waerd in jury to bineamen en moast it measte nei de papierkoer forwize. In proazastik fan F. Tuinstra en in fers fan juffer J. Dykstra, waerden mei in twadde priis bikroand en opnommen yn dit nûmer. De redaksje forklearret mismoedich: ‘dat it fiersto lytse tal ynstjûringen wol hiel dúdlik yn 't ljocht steld hat, dat wy op artistyk mêd fan 'e tsjintwurdige studinten suver neat hoege to forwachtsjen.’

Fuortgong yn Shakespeare

Lang om let is dan it twadde diel forskynd fan Shakespeare's Wurk yn Fryske oersetting fan dr. D. Kalma. It diel bifettet trije komeedzjes, ntl. De fekke nuet, In midsimmernacht-dream en De keapman fan Veneesje.

FREARK DAM