De Tsjerne. Jaargang 14

Inne de Jong:
Midsimmer

It jier bliuwt grien
ûnder de hege sinne
fan midsimmer,
de beammen sitte
fol fûgels en wyn,
it rypjende nôt
hâldt in ûnthjit
fan rike risping yn.
Forsille yn it sân
wachtsje kostlike stiennen,
om slipe to wurden
fan in mastershân.
Doarren en firasters
fan de feilige sitadel
steane iepen op alle winen
en yn it wite waeijende ljocht
giet in dichter op nij avontûr
de bloeijende lânnen oer,
op reis nei de kimen,
dêr it wûnder wachtet,
op reis net de nacht,
dêr't de Brandaris
syn fjûrbaen oer it wetter slacht,
om âlde forhalen
to fangen yn nije balladen,
om lâns heimige paden
de boarne to finen
fan it liet,
dat jit net songen is.