De Tsjerne. Jaargang 14

[p. 288]

Frysk en frjemd:

Ban foar prampolini

Dr. Peternolli, lektor yn it Italiaensk oan de Grinzer universiteit, hat op in fakânsjereis nei Italië persoanlik syn freon prof. Prampolini de lûdbân oanbean dy't dizze Italiaenske freon-fan-Fryslân en oersetter fan forskate Fryske fersen tasein is doe't er hjir okkerdeis yn Ljouwerter litterair formidden op bisyk wie. Op dy lûdbân binne de fersen, troch de dichters sels foarlêzen, fêstlein dy't foarkomme yn de lytse blomlêzing Poeti frisoni, in jiermannich lyn troch prof. Prampolini gearstald. It gehiel is oanfolle mei Frysk sjongen. In duplikaetbân is opburgen yn it Litterair Museum, dat by de Fryske Akademy ynwennet yn it nije Coulonhûs.

Priis foar e.b.f.

Op advys fan in jury, bisteande út de hearen Sjoerd Leiker, dr. Y. Poortinga en D.A. Tamminga, hawwe Deputearre Steaten de Gysbert Japikspriis 1959 (foar proaza) takend oan ús meiredakteur E.B. Folkertsma foar syn essayistysk wurk, publisearre yn de jierren 1955-1958 en foar syn litterair oeuvre yn it algemien. De hear Folkertsma hat lykwols, neffens it kommuniqué fan D.S., gjin frijmoedichheit fine kind en nim dizze priis oan. Syn eigen blêd De Stim Jan Fryslân formulearre dizze wegering sa: ‘Mei tank foar de eare, him dêrmei biwiisd, hie de bineamde lykwols biswier om de priis oan to nimmen.’ De priis wurdt alsa dit jier net útrikt.

Koart nijs

Foar de iepening fan de Fryske Boekewike hawwe S.J. van der Molen, D.A. Tamminga en P. Terpstra in kabaretprogramma Jubileumútforkeap skreaun, dat op de jouns fan de 9de oktober yn Boalsert opfierd wurde sil troch krêften út de Fryske kabaretwrâld. * Paulus Akkerman hat in nije roman ré: Reinder fan Kobus' Wytske. * Fryske útjeften wurde regelmjittich bisprutsen en oankundige yn it periodyk Books Abroad, in ynternasionael litterair orgaen, dat útjown wurdt troch de University of Oklahoma Press. Dizze skôgingen wurde, sa fornijt Frisian News Items, gauris forsoarge troch dr. Marten ten Hoor, Fries fan komôf (1890 yn Frjentsjer berne), dy't in mennich tige forneamde boeken op it mêd fan de wiisbigearte en de opfieding op syn namme hat. * Yn de nije jiergong fan Maatstaf sil Simon Vestdijk in rige ‘herinneringen aan tijdgenoten’ publisearje, û.o. oan Nijhoff, Slauerhoff, Marsman, Ter Braak en Du Perron. * Neffens in ûntwerp-regeling sil it ministearje fan U., K. en W. in oanfoljend honorarium tastean foar de meiwurkers fan de (subsidiearre) litteraire blêdden yn Nederlân fan twa goune de bledside. * De bondel essayistysk proaza Omgong en trochtocht fan Jan Piebenga, dy't de skriuwer yn syn Koarte Skiednis fan de Fryske Skriftekennisse al as yn 1957 op útkommen steande oanjown hie, sil nou dizze hjerst forskine by Osinga, Boalsert. * Fan de dichter Muus Jacobse, pseudonym fan prof. dr. K. Heeroma, heechlearaer yn it Nedersaksysk to Grins, sil earstdeis in nije bondel Nederlânske poëzij it ljocht sjen. * Lolle Nauta is rékommen mei it skriuwen fan in akademysk proefskrift, dêr't figuer en bitsjutting fan ‘de Frjemdling’ by greate Europeeske skriuwers as Dostojewski, Eliot en Camus yn bihannele wurde.

FREARK DAM.