De Tsjerne. Jaargang 14

[p. 167]

Tsjits Peanstra:

Mist

Dou dounsest op 'e fantasij
myn libben yn:
ik doch myn eagen ticht
om dy to sjen
ik slút myn earen
om dy to hearren
ik taest de stilte ôf
om to witten
hwa astou bist...
Dou
dounsest my foarby.

Rein

In fuotstap giet
yn 't drippen fan 'e goaten
yn 't slysterjen fan in auto
en it siperjen fan 'e ierde;
in skrouske wiette
lûkt yn 'e deade
en libbene dingen.
Ik wachtsje as in spouns
oant ik folsûge bin.