De Tsjerne. Jaargang 14

Frysk en frjemd:

Koarte forhalen fan Anne Wadman

De Fryske Bibleteek hat har útjefteplan foar 1959 bikend makke. Njonken de roman De deade by de libbene fan Ypk fan der Fear omfettet dat in útjefte fan in rige koarte forhalen fan Anne Wadman. De titel sil wêze Yn 'e lytse loege. Fierders kin yn dit forbân noch neamd wurde dat juffer Anne Porte it omslach en de bân fan Ypk fan der Fears roman forsoargje sil; it is foar de earste kear dat dizze kunstneresse op dit mêd wurksum is.

Gjin litteraire kwaliteiten?

De Kristlik Fryske Folksbibleteek soarge ek wer foar nijs. Pier Feddema - auteur fan Brekkende Brânning - is de winner wurden fan de KFFB-romanpriisfraech 1958 mei syn manuskript Gods Terskflier en A.A. van der Werf, ek in bikende namme yn dit formidden, krige de twadde priis mei En de sé wie net mear. It ekstra honorarium, útloofd foar in manuskript mei útsprutsen litteraire kwaliteiten, is net takend. De KFFB kaem fierders noch yn it nijs trochdat P. Terpstra yn Frysk en Frij yn in wiidweidich artikel njonken greate wurdearring ek jitris gâns krityk levere op it dwaen en litten fan it KFFB-bistjûr.

Nijs ut de tydskriften

It moanneblêd It Heitelân hat meidield dat de útjowerij Het Witte Boekhuis yn 1959 trije Fryske boeken útjaen sil yn in saneamde Heitelân-rige. Dat binne: in berneboek De wite fôlle fan Willem Brouwer jr., De brulloft fan de muonts fan Conrad Ferdinand Meijer, oerset troch fr. W. Brouwer, en in detektiveroman. * It tydskrift quatrebras hat it forskinen dit jiers noch oankundige fan in fersebundel fan Ella Wassenaer: reade runen. * Geart Jonkman hat de stok by de doar set en soarge foar in variant op de bikende dichtrigel fan (de jonge) Fedde Schuren: ‘Dy deis sil ik gjin dichter wêze...’. Yn Lyts Frisia (dêr't ûndertusken juffer W.L. Zyl.stra as redaktrise it plak romme hat foar mr. M. Oosterhout en drs. Teake Hoekema) hat Jonkman kategoarysk de forklearring ôflein: ‘Mocht der in nije stavering komme, dan bin ik gjin Frysk skriuwer mear.’ By in nije stavering forliest it folk syn lêste bytsje bitrouwen yn de eigen tael, is syn bitinken.

FREARK DAM