De Tsjerne. Jaargang 11

[p. 397]

Fedde Schurer en D.A. Tamminga:
Fearpikkende op 'e Parnassus

Nou't Fedde Schurer keazen is as lid fan de Twadde Keamer is der tusken him en D.A. Tamminga in polemyk yn kwatrinen ûntstien oer de kombinaesjemooglikheit en -winsklikheit fan dichterskip en keamerlidmaetskip. Wy litte it bigjin fan dy pinnestriid hjir folgje.

D.A. Tamminga:

Hwat silst Dou, Dichter, yn dy twadde keamer?
Muze en Partij ha nea ienselde neamer.
In breuk, hoe't men ek syf'ret, bliuwt der oer,
In breuk tusken de steatsman en de Dreamer.

Fedde schurer:

De dreamer, fij en fiis fan polityk
Fortsjocht al dreamende nei 't nevelryk.
Dichter, by David, Goethe en Piter Jelles,
Dyn plak is by de minsken op 'e dyk.

D.A. Tamminga:

Hwat sizze my dyn tsjûgen-ta-ûntlêsting?
Neat! Dichterskip dijt inkeld yn de fêsting
Fan stilte en ienlikheit, dat kies de lier
Mar nea de rattel ta dyn wapenrêsting.

Fedde Schurer:

'k Friet jimmer fan twa wâllen - moat ik kieze,
De knopen fan it riedslich libben tieze?
Dû, yn dyn feil'ge fêsting, giest it kwyt.
Dy't it bihâlde wol sil 't grif forlieze.

D.A. Tamminga:

Mien net my mei sofismen to forskalkjen.
De earste leafde is nea nei to malkjen.
Dyn lot? As fraksje fan in Fraksje skielk
Oan 't binnenhôf ta dreesman to forkalkjen.

(wurdt fuortset)