De Tsjerne. Jaargang 11

Frysk en frjemd:

300 Jier Gysbert Japiks

Oprjochte is in komité ta bitinking fan de 300ste stjerdei fan Gysbert Japiks: it Gysbert Japicx-Komité 1666-1966, dêr't dr. W. Kok foarsitter en ds. J.J. Kalma skriuwer fan is. Ta de leden biheart ek ús redakteur D.A. Tamminga. Der wurde plannen makke om ûnder mear yn 1966 of dêrfoar in boek út to jaen mei stûdzjes oer Gysbert Japiks en syn tiid. De krektlyn forskynde bibliografy Gysbert Japiks, Syn eigen wurk en artikels en boeken tan oaren forsoarge fan ds. J.J. Kalma docht ûtwizing hwat der noch oan de Gysbert-stûdzje ûntbrekt. Bihalven in helpmiddel wol dizze bibliografy ek in oantrûn en in oprop wêze, sa skriuwt ds. Kalma yn in wurd foarôf: Dit is der oant nou ta dien, hjir is it materiael, wurkers nim de lodde en help mei!

Skriuwers to Snits

It algemien Frysk moanneblêd It Heitetan hat ta gelegenheit fan it feit dat Snits 500 jier lyn stêdsrjochten krige hat in Snits-nûmer ûtjown (septimber 1956). Lolle Nauta hat dêryn in opstel oer Skriuwers to Snits bydroegen mei koarte, knappe karakteristiken oer Abe Brouwer, Anne Wadman, Sjoerd Spanninga, Douwe Tamminga, Kobe Hanenburg en Hylkje Goinga. ‘Der wenje yn Snits in stikmannich Fryske skriuwers, mar dat hêldt allinne yn dat it postadres fan dizze manlju en froulju Snits is. Men fynt yn har proaza en poezije skraechwurk eat fan Snits werom en men sil boppedat yn Fryslâns twade stêd net folie lju tsjinkomme, dy't har wurk kenne’, sa skriuwt Nauta, sels nammers ek in skriuwer fan Snitser komôf. Yn itselde nûmer skreau D.A. Tamminga oer Trije Snitser gymnasiasten: dr. O. Postma, dr. D. Kalma en Sam de Wolff, wylst prof. dr. J.H. Brouwer syn oantinkens oan syn litteraire foarming

[p. 376]

yn it Snitser gymnasiumformidden fêstlein hat. Frjemdernôch mist men yn dit nûmer in artikel oer plak en wurk fan dr. G.A. Wumkes as Snitser pastor.

Koart nijs rounom wei

Yn in nije standertûtjefte oer de dichtkunst, dy't yn Amearika ûnder de titel Dictionary oi Poetry and Poetics forskine sil (The Philosophical Library, New York) sil dr. Bernard J. Fridsma fan Grand Rapids in artikel bydrage oer de Fryske poezij. - De New York Times en de Grand Rapids Herald binne twa Amerikaenske blêdden dy't okkerdeis artikels oer it kulturele libben yn Fryslân publisearre hawwe; it earste oer de emansipaesje fan it Frysk en it twade oer it forskinen fan it earste diel fan Kalma's Shakespeare-oersetting. - Piter Terpstra, dy't okkerdeis syn earste Fryske roman publisearre hat Fjouwer minsken yn in stêd, is op 't heden to set mei in nije (Hollênske) roman dy't op Helgolên spilet. - Fan Theun de Vries sil meikoarten in nije roman forskine oer it forset yn de jierren 1940-1945: Het meisje met het rode haar. Obe Postma hat in nije bundel fersen printré, dy't dêrmei by Laverman n.v. forskine sil. - Fan R. Brolsma's roman Sathe Humalda sil foar 't neist takomme jier ek in nije printinge forskine. - Wike Zylstra hat yn Frysk en Frij in oprop dien oan dyjingen dy't noch brieven fan dr. D. Kalma hawwe. Hja wol dy graech opstjûrd hawwe nei it Douwe Kalma-hûs op 'e Rottefalle, soks mei it each op in yn de takomst to skriuwen biografy. - Fan Noarske jildlike stipe oan in plan foar in Noarwegen-nûmer fan it Bretonske tydskrift Al Liamm sil spitigernôch neat komme. De Noarske kultuer-attaché to Parys hat skreaun, dat de redaksje ta in rounte biheart dy't yn de lêste oarloch ‘net goed’ wie. De Noarske bimiddeler K.L. Johannessen leaut dêr neat fan en ek op it departemint to Oslo, dêr't dizze saek bihannele waerd, sjogge hja efter dizze ûtspraek in óare eftergroun. - By ûtjowerij Bosch en Keuning to Baarn is yn de Opgangserie forskynd De Bruidegom komt, in Hollânske oersetting fan de histoaryske roman oer de Werdopers fan Ypk fan der Fear. De oersetting is forsoarge troch Aize de Visser, redaksjeskriuwer by Bosch en Keuning N.V., fan komôf in Hearrenfeanster. It docht jin nij dat, wylst de oarspronklike titel wöl neamd wurdt, neame oanjown stiet dat it hjir om in oersetting út it Frysk giet.

FREARK DAM