De Tsjerne. Jaargang 11

Frysk en frjemd

De tsien wer thus

In nijtsje dat om mear as ien reden mei read kryt oan de balke kin: lang om let sil der in Fryske ‘oersetting’ útkomme fan Alke's Tiental, ien fan de ‘klassiken’ en faeks wol it forneamdste ûnder de berneboeken yn Nederlên. Sjoukje Troelstra-Bokma de Boer (.Nienke van Hichtum’) skreau it yn de tiid doe't har man, Piter Jelles, as advokaet yn 'e pleit wie foar de Hogerhuizen en dêrfandinne seis in skoft, fanwegen opsetlike mislediging, yn 'e finzenis tahêlde moast.

Bihalven in plicht foar Fryslân oer bitsjut dizze forfrysking (ûnder de titel De tsien fan Martens Alke) it neikommen fan in eareplicht foar de forstoarne skriuwster oer. Nienke van Hichtum hat it altyd as great leed field, dat ien fan de lêste berneboeken dy't hja skreau, De jonge priiskeatser, yn it Frysk yn boekfoarm net forskine koe, om't nimmen it risiko oandoarst. (Nei har dea op 9 Jannewaris 1939, is it der lykwols dochs noch fan kommen). De forfrysking fan Alke's tiental, forsoarge troch mefrou T. Eisenga-De Groot, sil mei goedfinen fan de erven fan de forstoarne skriuwster útkomme. De fan komôf Fryske yllustrator Tseard Bottema sil de printsjes meitsje.

Tseard Bottema hat ek in nije biwurking makke (skreaun én tekene) fan in oar, net minder ‘klassyk’ berneforhael Der wie ris in âld wylke, neist jierren ek mei yllustraesjes fan syn hân en mei

[p. 176]

tekst fan Nienke van Hichtum by R. van der Velde to Ljouwert yn it ljocht kommen. Dizze nije versy is, lykas De tsien fan Martens Alke, op priemmen set by Laverman N.V.

Levende talen en it frysk

It bikende tydskrift Levende Talen (ûnder redaksje fan dr. Ellerbroek) sil nou tonei ek omtinken jaen oan Fryske ûtjeften dy't dêrfoar yn 'e bineaming komme. Dr. Y. Poortinga is oansocht dizze ôfdieling foar syn rekken to nimmen.

E. Howard Harris Tachtich

De Welsk-Ingelske dichter en essayist E. Howard Harris to Swansea, dy't al sa mannich biwiis jown hat fan syn bilangstelling foar de Fryske litteratuer - yn dizze rubryk is der gauris omtinken foar frege - hopet t.k. Maeije 80 jier to wurden. Syn stûdzje oer The Literature in Friesland sil nou ek ûtjown wurde, en wol by Van Gorcum en Comp. to Assen.

Koart nijs

Us redakteur Marten Sikkema is keazen ta samler fan De Fryske Bibleteek. - De slach om Keulen is de titel fan de histoaryske roman fan A.J. Wybenga silger, dy't dit jier troch ‘De Fryske Bibleteek’ ûtjown wurde sil. - De roman De Breugeman komt fan Ypk fan der Fear sil yn Nederlânske oersetting forskine by de ûtjowerij Bosch en Keuning N.V. to Baarn. - Yn it Febrewarisnûmer fan Maatstal hat Fokke Sierksma in koart en saeklik antwurd jown op de smoarge oanfal fan J.B. Charles (mr. dr. W.H. Nagel) okkerdeis yn itselde tydskrift. De redakteur Bert Bakker hat forklearre dat hwat Maatstaf oanbilanget der fierder gjin wurden om ‘smoarch’ makke wurde sille. Mar yn de Maertôflevering is it alderlêste wurd oan A. Roland Holst, dy't dizze bekfjochterij ôfkart, salang't skriuwers mei talint der har kreften oan forgrieme. - It tydskrift Quatrebras sil bisykje yn de kommende jiergong in trijetal bysûndere nûmers to jaen. Op 'e nominaesje steane û.o. in fersebondel fan Jelle de Jong, ien fan Ella Wassenaer en in bondel kabaretlietsjes. - Minister Cals hat mr. G. Kamphuis en Dirk de Jong opdracht jown ta it gearstallen fan in folsleine samling fan de Nederlânske forsetspoëzij (mei taljochting), dy't yn 'e bisettingstiid forskynd is. - Mies Bouhuys, Michel van der Plas en Jan Wit hawwe elk in ministeriële opdracht krige ta it skriuwen fan in koart bifrijingsstik. Soe Fedde Schurer, as er aenst dóchs yn 'e Keamer komt, ek ris pleitsje kinne foar soartgelikense opdrachten oan Fryske auteurs? Om fan reisbeurzen noch mar to swijen? - De Grinzer gymnasiumlearaer Joop Sprock (fan komôf Ljouwerter) sil de opfiering regissearje dy't Opsterlênske toanielamateurs dit jier op de ‘Mienskipsdei’ jaen sille fan Adam Stvoritel (Adam as skepper) fan de Tsjechyske bruorren Capek, to forfryskjen fan Marten Sikkema. - It Ljouwerter Toanielselskip hat ta gelegenheit fan syn jubileumfiering in greate toanielpriisfraech ûtskreaun; yn de jury hawwe û.o. in sit J.W.J. Witsen Elias en A. Vandamme.

FREARK DAM.