De Tsjerne. Jaargang 10

[p. 363]

Jelle de Jong:
Douwen fan pinkster.

ik sjoch de estafettefleaners
hja bringe de geast fan 'e himels
hja wachtsje by de poarten
(eltse himel hat syn eigen dou)
hja binne fol fan 'e geast

sjoch dêr falt de sawnde op 'e ierde
oe oe de elektryske triedden
oe oe de forbjustere hoann' op 'e toer
dy mei hy net reitsje

doch de mûle iepen
liz de tonge tsjin de lippen
set de hannen oan 'e earen

bern wurd wekker
sjoch nei de dou fan 'e himel
âlden wurd wekker
sjoch nei de dou fan 'e himel

de dou fan 'e geast sil yn jimme farre
jim sille profetyske fonken forspriede