De Tsjerne. Jaargang 10

[p. 297]

Fedde Schurer:
Fiif fersen.

Foarlan.

Dy't spot mei syn bettere witten
Sil doarmje op dûnkere wegen
Loslitten, oerlitten, forlitten.
Al djipper omlegen
Sil him God forsmite
Dêr't de grousume mythe
Fan hel en fordommenis
Taestbere wierheit is.
Sa forkomt in houn
Dy't syn baes ûntroun
Forkomt, dêr't it ivich forwyt is
In dier, dat it spoar kwyt is.

[p. 298]

Aventur.

Doch dyn bêst om myn part, mjuksje
Dyn konstruksje
As in blom op myn bihang.
Al dyn glêdde wissichheden
Ha gjin reden
En hja meitsje my net bang.
Abram Kuyper en Jan Schouten
Makken fouten
Troelstra hat him raar forsind -
't Libben bliuwt lykwols to dragen
Inkeld om't it alle dagen
Mei in skjinne laai bigjint.

[p. 299]

Ave.

As Bileäm ha 'k hillige ingels met
As Bileäm ûnskuldige ezels slein
En foun, forneatige yn ban en boete
De úflecht en de slotformule net.
En doe 'k mar wachte op 'e bittere ein
Sette in hân my tsjin 'e kym oerein -
O libben en o ljocht fan God, wês groete!

[p. 300]

Dokter, lit my.

Dokter, lit my stil oan
myn lot oer.
Ik wit, it komt op 'e wil oan
en ik bin hwat oerstjûr
mar stjûr
my dêrom net op fekânsje
neffens in dwaze wizânsje
de heale simmer
hwant hwer is de ienlikheit slimmer
as yn Gods frije natûr?
Under de swijende beammen
hearsket in net to bineammen
leadswiere moedeleazens.
Der bongelje oan alle tûken
stoarne problemen út boeken
ûntdien fan alle kreazens.
Togearre kin men soks oan
mar hwat moat in minskesoan
dêr lykme allinne
tsjin bigjinne?
Dokter, stjûr
my net yn Gods frije natûr
lit my oan myn lot oer
lit my oan God oer -

[p. 301]

Risiko

Hwat jowt it dy ofstû foarsichtich libbest
mei God en eare nei de tachtich stribbest -
miskien is dy chauffeur al ûnderweis
mei opdracht foar dyn lêste reis.
Hoestû dy warste as in liuw
de kanker, jonkje, sit al op 'e wiuw
of, komyske biskamming
de hertforlamming -

Al bist foar dea en libben assurearre
men kin insidinteel en hommels stjerre
meitsje dy net to slim oerstjûr
't kaem betteren as dy wol oer.
Mar dronken lju en lytse bern
dy wurde grif, dat sil men altyd sjen
op fyts of hounekarre
wûnder biwarre.