De Tsjerne. Jaargang 10

[p. 274]

Fedde Schurer:
Kwatrinen

't Is bar om bar misdiedich en grotesk
Mei geast bigoun, bist einige yn it flesk
Mar astû mienst der dochs jit troch to glûpen
Yn hiel Gods net fynst net sa'n wide mesk.

*

Dû diest it kweade en naemst dy 't goede foar
En hwatst' dy foarnaemst gong aloan toloar
Mar nim nou ienkear rissolút de hammer
En driuw in spiker yn dy efterdoar.

*

Doe't alle lampen flakkeren en walmen
Myn echo's sinleas yn myn earen galmen
Spriek my it rêddend wurd ynienen oan
Yn 't kleare hertelûd fan Davids psalmen.

*

Inkeld dit iene mar: Hear, bliuw my nei
En nim Jins Hill'ge Geast net by my wei.
Hwant hwat dan noch, soe ek dit hert forbliede
Mei 't stjerrend ljocht fan de ûndergeande dei -

*

Allinne dy't willemoeds God forliet
En sa fan 'e himel de hel ynglied
Ken de koele seine fan straf en oardiel
En de feestlike grountoan fan 't boeteliet.