De Fryske skriuwers Geart Jonkman, Marten Sikkema en dr Y. Poortinga sille yn 'e mande in bundel koarte (spoek-)forhalen skriuwe. Forhalen yn elk gefal mei stik foar stik in min of mear mysterieuze ynslach. Elk fan harren sil seis forhalen bydragen. De opset is útgien fan Sikkema en Poortinga, dy't letter Jonkman frege hawwe, ek mei to dwaen. J.J. Spahr van der Hoek sil by elk fan de forhalen in tekening meitsje, is 't doel.
Wadman folget Sierksma op.
De lieder fan de R.O.N. hat de hear Anne Wadman ré foun, aenst as opfolger fan dr Fokke Sierksma it litterair kertier fan dizze omrop to forsoargjen. Dr Sierksma, wittenskiplik haedassistint oan de Ryksuniversiteit te Leiden, hat him dêr nou ek nei wenjen set, dat fierder meiwurkjen oan de R.O.N. waerd him to biswierlik. Wadman sil, fanwege syn o.s. promoasje, noch net fuortdaliks ynfalle kinne.
‘Uit alle windstreken.’
By C.P.J. van der Peet te Amsterdam is útkommen: ‘Pegasus op Wereldreis. Poëzie uit alle windstreken in Nederlandse vertaling’, sammele en ynlaet fan Dick Voerman en W.A. Braasem. Bihalven oersettings fan Frânske, Dútske en Ingelske poëzij en út gâns oare Europeeske, Aziatyske en Amearikaenske litteraturen (meielkoar mear as tritich ûnderskate), bifettet de bundel ek in ôfdieling dy't ‘Friesland’ hjit. Yn Nederlânske oersetting binne fersen opnommen fan J.H. Brouwer, Rixt, G.N. Visser en Freark Dam.
Nochris nijs út Hollân.
By Tjeenk Willink to Haerlim is útkommen Het Week-end Boek, sammele troch Clara Eggink en Guus Sötemann. De Fryske litteratuer is dêryn fortsjintwurdige mei ien fers: De Sitadel, fan D.A. Tamminga (yn it Frysk, sûnder oersetting). Spitigernôch is dat fers mei ham en gram oernommen út de blomlêzing ‘25 Fryske dichters’ en steane der (dus) in stikmannich grouwélige printflaters yn, dy't it gedicht perfoarst skea dogge. Efter yn it boek stiet, it fers is oernommen út de bundel.... ‘It Heitelân’ fan D.A. Tamminga(!) Ek stiet it fers nou fansels noch yn 'e âlde stavering. By in nije printinge sil om dy dingen tocht wurde moatte.
Opdracht foar Sjoerd Leiker.
Sjoerd Leiker hat, lykas bikend, fan de minister fan Underwys, Kunsten en Wittenskippen opdracht krige en skriuw oer Ljouwert. Leiker is fan doel, in novelle to skriuwen, dy't likernôch 6000 wurden great wurde moat. Oer in eventuele útjefte al of net yn 'e mande mei it wurk fan de oare skriuwers dy't in soartgelikense opdracht krigen, stiet noch neat fêst.
Auteursrechtelijk beschermd