De Tsjerne. Jaargang 6

[p. 20]

Tsjits Peanstra:

Dream-eilan.

O, dream fan stil bigearen
Hwer fynt myn herte rêst?
Mocht iens it tij dan keare.
Hwant wurdt in lôge dwêst
Dy't út it djipst forlangen
Ta hege himel kliuwt?
Gjin wyn dôvet har sangen
Sels har meldije bliuwt.
O mocht ik oan myn seamen
Dyn drôf-sêft rûzjen hearre.
Dán eilân fan myn dreamen
Dán kin ik lokkich stjerre.

It deade doarp.

De loft wie read noch, fan 'e lêste fjûren
En yn 'e fierte boldre noch 't gewelt.
Mar yn dit doarp forlear de dei syn ûren
En hie de dea oer 't al syn wetten steld.

De holle finsters gappen yn it tsjuster
En liken wêzenleas en stom en blyn.
It libben hie gjin moarn en ek gjin juster
Hwant 't stoude mei de jiske yn 'e wyn.

Sa gongen dei en nacht allyk forlern
En losten ljocht en dûnker op yn skaden.
Mar efter de tobroazele barrikaden
Socht noch in roazeleat syn âlde paden
En stie dêr, as in lyts forlitten bern....