De Tsjerne. Jaargang 4

[p. 64]

Frysk en frjemd.

Fryslan - Israel.

Sam de Jong, in yn Fryslân berne Joad, publisearre yn it wykblêd ‘De Stem van Israël’ fan 21 Jann. '49 in interview mei Fedde Schurer oer de oerienkomst tusken Frysk en Joadsk nasjonalisme, soks nei oanlieding fan de solidariteitsforklearring fan in tal ‘prominente Friezen’. Nei't de hear De Jong meidielt: de earste absolute solidariteitsforklearring fan in Westjeropeeske nasjonale biweging mei Israël.

Fryslân - Itaelje.

Dr. Giacomo Prampolini wurket oan in lytse karlêzing fan moderne Fryske dichters en hat dêrta al in 15 Fryske fersen oerset yn it Italjaensk. De útjefte hinget lykwols ôf fan de genede fan de útjowers, dy't it hjoed de dei yn Itaelje net bot op 'e poëzij stean hawwe. En dat yn it lân fan Petrarca en Dante! Dr. P. hopet lykwols dat er it foarelkoar kriget.

Fryslan - Bretagne.

‘Le peuple Breton’ fan Desimber hat in artikel publisearre fan Dr. J.W. Schröder: ‘Le fédéralisme dans les “Sept Provinces”.’ Dr. Schröder is in Noardbrabander, dy't de Fryske biweging in goed hert tadraecht. Yn it Jann. nûmer fan itselde tydskrift stiet in artikel oer de ‘nasjonale minderheden’ fan Dr. H. Brugmans, de foarsitter fan de Jeropeeske federalistyske biweging, dat foar Fryslân ek fan tige bilang is, en bisprekt Klaes Dykstra nije Fryske litteratuer.

Fryslan - Nederlan.

Prof. Dr. J.H. Brouwer hat yn opdracht fan de Minister fan O.K. en W. in útjefte rémakke fan J.J. Starters ‘Friesche Lusthof’, forsjoen fan ynlieding en oantekeningen. Lang om let komt men dus ris fan de forâldere Van Vloten ôf!

Fryslan - Fryslan.

De Fryske Propagandakommisje fan de Drankbistriders N.V. hat útjown: ‘Under eigen folk’, in moai handige en mei soarch gearstalde blomlêzing fan nij Frijsk proaza en ienfâldige poëzij. Tetman de Vries hat in nije revue skreaun, dy't ‘It rike jier’ hjitte sil en yn 1949 foar 't earst opfierd wurdt. De ‘Fryske Bibleteek’ is fan doel, dit jier út to jaen in samling sketsen fan B. Tuinstra, in fersebundel ‘Spegelskrift’ fan Sj. Spanninga en in nije greate samling essays en skôgings fan E.B. Folkertsma: ‘Toer en Tsjerke’ II.

Sa slim net as hear gabbe wol preket......?

Yn it Jann. nû. fan ‘Het boek van Nu’ skriuwt ien fan de redakteuren, Garmt Stuiveling, in artikel yn mineur oer ‘De dodendans der tijdschriften’, dêr't û.m. yn opneamd wurde de easken dêr't in goed tydskriftredakteur (neffens G.S.) oan foldwaen moat. Stuiveling wiist nei Flaenderen mei syn iene greate ‘Nieuw Vlaams Tijdschrift’ as ljochtsjend foarbyld. Dat der yn it Noarden in ‘Tsjerne’ forskynt op itselde prinsipe, dy't it allinne langer úthâlden hat as de Hollânske litteraire blêdden, skynt er it namen net wurdich to achtsjen.

FREARK DAM.