De Tsjerne. Jaargang 3

Marten Sikkema:
Quo vadis

Dit oan to sjen: de wûnderlike berte
Fan maitiidsblommen út biferzen groun,
It simmersoeijen oer in wrâld, ûntboun
Yn bûnt gewaeks en sulverblanke fearten,

De neakne fjilden, yn harsels bisletten
Under it rûzjen fan 'e hjerstge joun,
De streamen yn 't bistoarne reid forroun
As winterdizen weve oer de sleatten -

En net to freegjen: hwerfandinne komt en
Hwerhinne giet men, sa't in reizger tsjocht
Hwaens wiis bitrouwen eltse tael forstiet:

It jûchjen fan 'e ljurk dy't kliuwt nei 't ljocht,
It byljen fan in houn yn iidle romten
Binne him strofen fan itselde liet.