De Tsjerne. Jaargang 3

[binnenkant achterplat]

Frysk en frjemd

Hollânske utjowers

De Hollânske útjowers sitte net stil. A.A.M. Stols kundiget yn in aerdich prospektus it forskinen oan fan in tal nije romans, û.o. ‘Grensconflict’ van Frank Wilders en ‘Het boek van Joachim van Babylon’ fan de Flaemske auteur Marnix Gijsen; it lêstneamde waerd earder ôfprinte yn it ‘Nieuw Vlaams Tijdschrift’. By deselde útjower forskynden koartlyn de sammele gedichten fan Bloem, Campert, Keuls en Lehmann, in nije bondel fan Jan van Nijlen: ‘De Dauwtrapper’ en in wurkje fan G.H. 's Gravesande: ‘E. du Perron, herinneringen en bescheiden’. De útjower Van Oorschot to Amsterdam makket in goed figuer mei it oankundigjen fan de ‘Verzamelde Werken’ fan de yn 1919 forstoarne dichter-filosoof J.A. Dèr Mouw.

Fryske utjowers

Guon Fryske útjowers tinke blykber mei it bikende ald-wyfke: ‘Hwat stilder hwat better.’ De redaksje fan De Tsjerne kriget alteast fan de measte nije Fryske romans gjin resinsje-eksimplaer tastjûrd. Achtsje de pasjinten har wetter miskien to smoarch om dermei foar de dokter? Ien útjower hat yntusken in eleganter oplossing foun: hy stjûrde in eksimplaer fan in roman mei it forsyk dy mar net to bisprekken....

Fryslân en Skandinavië

Frou Greta Baars - Jelgersma, bikend troch har oersettings út it Noarsk, û.o. fan de Folksmearkes fan Asbjörnsen en Moe (2 dln., útj. De Haan, Utert), sil yn 'e kompe mei har man yn in artikel foar in Noarsk tydskrift de Nederlânske litteratuer bihannelje. Ek de Fryske litteratuer sil - tige yn 't koart - op 't aljemint komme, is it doel.

De Vrije Pers exit

De redaksje fan it wykblêd ‘De Vrije Pers van het Noordererf’ dielt mei dat har blêd yn 1948 net mear forskine sil. Guon meiwurkers sille oergean nei it moanneblêd ‘Het Gemeenebest’, dat by deselde útjower (Van Gorcum Comp., Assen) forskynt.

M.S.