De Tsjerne. Jaargang 2

[p. 304]

Marten Sikkema:

Genietsje, Lea...

Genietsje, lea, en laitsje blier:
Mei brutsen trommen, skuorde flaggen
Oerlibben wy de swierste slaggen
To dounsjen op dit faei kertier.

It skeind kristalguod oer de flier
Ropt faeks dyn dreamen noch towekker.
De byltnis fan de messestekker
Sjocht gleonseach út oer 't read fortier.

Nou dounsje, lea - mar doar yn 't tsier:
It oargel droant as skuorde klokken.
Aenst fjochtsje rotten om de brokken,
Aenst flechtsje wy nei 't lêst kertier.

Miskien...

Miskien dat earne noch in bern
Towekker skrillet yn 'e sinne
As maitiidsroken stil bigjinne,
En jowt him oan de priel forlern

En sjocht omheech: nea hat er droegen,
De beam dy't alle stoarmen fong,
Om't neat him ea ta bloeijen twong,
Om't nimmen heksebiezems roege,

En trêddet glimkjend troch it ljocht
En nimt de bile fan de woartel. -
Wy slane, lea, de doar op skoattel:
Us fûgel hat syn sang folbrocht.

[p. 305]

Joun en dage

Flechtsje yn jountiids skerte hwant it swurd
Stiet driigjend aldendei. Sa is er kommen
Dêr't skimerdreamen waerje om 'e hurd
En har de leafste delbûcht oer de blommen.

Hja glimket myld. Gjin klank skout út syn baen.
Dit is it lok, bitinkt er: hoe to dragen?
Stadiger, tinzen dy't sa stjûrleas jagen,
Stadiger, herte. - Mar 't wol aloan rêdder slaen.

*

Gerdinen iepen: leaden loften klampe
Oer wiete fjilden: griemerige hel.
't Ald lichem is oanein fan al syn rampen
Mar 't herte fjochtet jit yn d' inge sel.

Der is gjin nacht sa from of wy forriede
Elkoarren tsienris (is dy hoanne dea?).
Hy sjocht net om, hy streaket d' eigen lea.
De sinne stiet to blieden...

Testamint

Nou slacht de reinjacht troch de blêdden,
Bigjint de stoarm syn wrede reis.
Us, hearskers fan forgiene stêdden,
Fret nou it nachtwyld oan it fleis.

Wy glimkje moedich, mar biwuolle
Yn triedden fan it einich skaed
Lûkt út de eangstme fan de puollen
Gjin goede god ús mear op 't paed.

Set, bouwers oan it nij gewisse,
Gjin tinkstien ús op fêste groun:
Us lichem sil gjin stjerling misse,
Us siele rikket yn God's oun.