De Tsjerne. Jaargang 1

[p. 245]

Inne de Jong:
Kwatrinen fan Omar Khayyam

VI

De iene dreamt fan hearskippij en macht,
In oar fan 't paradys nei need en nacht,
Mar dû, nim hwat it libben hjoed dy jowt -
O hark: in trom, dy 't yn 'e fierte slacht!

VII

Hjir bloeit de roas, aenst komt de jonge wyn,
Dy bliest der mei syn sterke longen yn
En 't kostlik klaed is skuord - mar oer de groun
Gean wy troch roazeblêd en sinneskyn.

VIII

Beide, de gjirrigert en dy 't it jild
Op alle winen struit, romje it fjild
En wurde moude, dat takomstich skaei
Wer opdolt en wer omset yn nij jild.

IX

Yn dizze haev'ne Karavanserai
Mei iiv'ge wikseling by nacht en dei,
Bitink, hoe 't mennich sultan mei syn pracht
Hjir toeve in ûre en waerd foar jimmer wei.

X

De romer, leaf, en skink my jitris yn,
Ik spiel forline en takomst wei mei wyn.
En moarn? moarn is 't faeks dien en bin ik ien
Fan juster en sawn tûzen jier forlyn.