De Tsjerne. Jaargang 1

[p. 178]

Klaes Dykstra:

Fantasij

In kleurich mearkelân to dreamen,
Eksoatysk myld,
Dêr 't roazen bloeije oan gouden streamen,
Bloedread en wyld -
Dêr 't ranke boatsjes sierlik driuwe
Fan glâns oertein
En sulverljochte fûgels kliuwe
Yn gouden rein -
En dan yn 't rûzjen fan har fearren,
Yn 't spielend wiet,
In triljende muzyk to hearren,
Bitsjoenend swiet!....

De ljochte kleurebylden rane
Ta floeiber goud;
Yn 't jounljacht stiet in rút to barnen
Yn 't ramt fan hout.

Fisioen

De simmernacht

Spint oer it gea syn reagen

En 'k mien, twa eagen

Sjogge my nou oan;

Ut 't tsjuster wei,

Twa glinsterjende eagen,

Dêr 't stille leafde yn bloeit,

Al mylderoan....

[p. 179]

Ofskie

It keine oantlit bûgend oer syn holle,
Dy 't sillich-stil har yn de skerte lei,
De smelle hân, dy 't him de sliepen kuolle,
Hja sprieken mear as ea it mûlke sei.

Hy loaike omheech yn dizze leave himel
En seach twa stjerren glinstrjen, wûndre tear....
Dit bleau him 't iennich beaken, doe 't er ienmel
Dreau om 'e súd mei rânsel en gewear.

Soldatebrieven

Idere joune let siet hy to skriuwen,
Op Kreta, fan syn leafde en iivge trou.
En dei oan dei joech yn 't lân fan dize en miuwen
De post in brief oan 't kwierich famke ou.

Dat hat sa, mien ik, trije jierren duorre.
En 't fredesliet song wol in frjemd refrein:
Doe 't hy weromkaem yn de âlde buorren,
Foun hy it fanke oan de post forsein.