De Tsjerne. Jaargang 1

[p. 59]

Sjoerd Spanninga:
Brief fan Don Juan

Spanje is yn dyn moarswart hier
En dyn bikoarlik antlit,
O dochter fan Andalusië!
Dyn lippen binne sa fris as druven
Yn 'e tiid fan de rispinge,
En dyn wangen ha de kleur fan ljochte oliven;
Ek hastou de noas en earen fan in jonge segeunerin.
De libbenstier ljept út en yn dyn dûnkere eagen
As it boartlik geflûnker fan in wjittering
Under de lange teisters fan fynfearrige leaven;
De sierlike wynbrauwen binne dêroer as in bôgjend forwulft.
Ja, dyn gracia is allyk in bûntsidene sjael,
Of de koartswiligens fan in prinsesse,
As simmerfûgel flinterjend
Troch de foarstlike sealen fan it Alhambra,
De reade keningsstins,
Yn de dagen fan de Islam;
In fontein fan wurden springt op út it moarmeren bekken fan dyn tosken.
It dertene rokbiweech om dyn hearlike fuotten
Longert nei de dounsjende wille
Fan in fandango,
En it wytwjokjend kantwirk fan dyn mantilla
Hat de feestlike fleur fan it âlde Sevilla.
De ûntweitsjende weelde fan dyn sêft-tinende boarsten
Is kostlik en fol ûnthjit
Als de oranje-hôven yn it foarjier.
Fan dat de iere moarn him slieprich útrekt
En slûchtrêd oan 'e kym forskynt,
Om dan sterk as de dei
Syn gouden sinnespearen to slingerjen
Nei de Sierra Nevada,
De bergen, dy't snie op 'e skouders drage,
Oàn't de sereno sjongend omgiet yn de strjitten

[p. 60]

 

Fan Granáda,

 

En in ûntsachlike macht de blinkende moanneskiif

 

As in diskus oer de nachtlike stjerrefjilden goait,

 

Wrakselet myn langstme mei de têdde ûren,

 

Dy't my skiede fan it stille lok,

 

Dy wer kuijerjen to sjen

 

Mei in toaisel fan roazen út de paleistunen,

 

En de muzyk fan dyn lûd to hearren

 

Under it foarbygean.

 

Doe't ik myn capa útspraet haw

 

Foar jim drompel,

 

Bistou mei in tankbere laits

 

Oer myn blide forwachting yn 'e hûs roun,

 

En de heimige tael fan de waeijer

 

Yn dyn hannen

 

Makke my dronken

 

En oerémus

 

As de klank der castanũelas

 

By in gitaer to skimerjoun.

 

Hwannear, o fanke mei dyn leave loaitsen,

 

Kin ik komme, om de kalkoen to ploaitsen?