De Tsjerne. Jaargang 1

[p. 39]

Fedde Schurer:
Strofen

I.

Profeten by troppen
De wegen bin swart
En party bin roppen
Mar ink'len forkard.
De lospriis wurdt helle
Op swiere bitingsten
Ta it lêste bitelle
Mei bloed en eangsten.

II.

Men lêst by klassiken
En nijere skriuwers
Fan galgen en liken,
Fan slaven en driuwers -
Boppe't leed dat nea metten,
Nea woegen noch teld is
Sjongt in dwaes syn útlitten
Gloria in excelsis.

III.

Flerk yn'e stoarmen,
Saeijende miuw,
Staet út'e noarmen
Fan't wenstich bidriuw,
Yn gefaer lef noch kjel,
Oft hysels in oar wie -
Mei de wyn op en del
Sa't de fûgel it foardie.

[p. 40]

 

IV.

 

 

 

Hy is de argeleaze

 

Dy't blynseach wint

 

Dy't út wrek en weaze

 

De himel birint,

 

Dy't boppe de wieljende

 

Ungroun wjokket

 

En lykwols net fortwiivlet

 

Of forûngelokket.

 

 

 

V.

 

 

 

Sjongend tsjin'e klippen

 

Skiednis en needlot,

 

Rebel foar it libben,

 

Tobekslein op God,

 

Jubeljend tsjin'e klippen

 

Wraldeangst en lijen

 

Komt it liet op syn lippen

 

Nea net ta swijen.

 

 

 

VI.

 

 

 

Hy heart ta de knokploech

 

Dy't sinleas yn't fjûr stie

 

En't forwar net opjoech

 

Doe't alles toloar wie.

 

Grif wurdt ien dei de lêste

 

Yn dit koart geding,

 

En't sjongt jimmer it bêste

 

Under Damocles' kling.

 

 

 

VII.

 

 

 

Hy, dy't rjochtop trochgiet

 

By great alarm

 

En floitet syn spotliet

 

Op in stom unifoarm

 

En syn marseillaise

 

Troch de razzia -

 

Kin it dy man wêze

 

Dy't wy nedich ha?