De Tsjerne. Jaargang 1

[p. 26]

A. Deelstra:
For ub

Op 'e joun fen 'e Nasjonale Feestdei waerd to Grins op 'e Greate Merk in fjûrwirk ôfstitsen. De ruines fen it Skoltenshûs riisden as symboalen fen it Tredde Ryk neaken en wreed oerein.

En yn dy joun do't heech de fjûren lôgen
De pylken baernend barstten yn 'e loft,
It blide ljocht yn greate, brede bôgen
It folk oerstreamde, gearkaem op in kloft.

Dy joune by de neakene sylhouetten
Fen 't Skoltenshûs - forbriz'le en forbaernd -
As wylde planten yn de nacht opsketten,
Ha dizze bylden ús ta ynkear maend.

Hwent op dy souder Ub, en yn dy kelder,
Dêr bistou martele en skopt en slein....
Mar jimmer bleau dyn geast by de forhoaren helder
En nea hastou ien ink'le namme sein.

En yn dy joun, by 't lêst oerwinnend lôgjen
Wylst de bifrijing oer ús hinne gie,
Wier't of der yn det ljocht - for elk to skôgjen
It byld fen dy en al dy helden stie.