Trotwaer. Jaargang 34

[p. 262]

Sikke Doele

feech oan 'e kym

no bist allinne
noch mar
in feech oan 'e kym

oare boaten
- grouwer, hastiger, glêder -
stome nei dy op

tûzenen dúnfioeltsjes
reauntsje nachts in fyn liet
fan langstme en ferjitten

foar de flinters
fan sint jan want dy ha
mar eefkes de tiid

ik núnderje mei
oft ik nearne weet fan hie
nea ôfskied nommen hie
nearne skuld oan hie
der nea wat foarfallen wie

[p. 263]

twiljocht op 'e seedyk

stadichwei langer
de skaden fan de skiep,
swarte wolken (wite krunen)
driuwe djipper it gea oer

wa't gersket, wurdt griis
blaaie de skiep? ha se
fermoedens, ferwachtings,
ferswije se eat? ach, se

meane roppich de raaien
slaan op it lamjen gjin acht
wurde opnaam troch de wolken
traapje de lucht yn ûnmacht

Koart foar syn ferstjerren op 29 juny 2002 hat Sikke Doele dizze twa fersen útsocht foar publikaasje yn Trotwaer. Se komme út de bondel Longereilân, dy't fan 't hjerst by de Friese Pers Boekerij ferskynt. - Red.