Trotwaer. Jaargang 34

[p. 228]

Steven H.P. de Jong
muzyk fan it balkon

I

moarn sille wy miskien
net wekker wurde

Hear, jou ús sliep en sûzelj' ús yn 'e dream
de tekkens slagge de earms om ús hinne
de âlde pine glydt dan stadich fan ús ôf
en bylden flinterje my troch it brein

in rotsblok griis en rûch
riist foar myn eagen
faaks is 't in stientsje fan it grintpaad
nei de doar
ik stean der slim ûnhandich foar
swalkjend ynsekt troch tinzen en ferhalen
yn in taal dy't bloeit en skielk
wer dôvet

ik klopje oan
net ien docht iepen
fiere muzyk komt earne fan 't balkon

[p. 229]

II

evokatyf

wat is der dochs mei dat balkon
der rûgelje noaten oer de balustrade

evokatyf
stiet Bach te ratteljen oan 'e tichte doar
of
is it Mozarts held're serenade

de mem fan Ludwig van B.
sit stil te hymjen efter it behang
please gjin abortus gjin abortus nee

in faaie fûgel fluitet moai en lang
der rûzet in românse oer de dampe tunen
en earne ropt der ien
ik kom ik kom

dan is it stil hiel stil
en tsjuster
fan hjoed nei juster is
gjin paad werom