Trotwaer. Jaargang 34

Trioel
't Is wat

It wrâldbyld fan Trinus Riemersma sjocht der hjoed de dei simpel út (‘Altyd wat!’, side 29). Der binne twa kampen: dat fan de ultime fijannen Amearika en Israel en dat fan de ‘saneamde ekstremistyske moslims’ (kursivearring fan my). Yn dat bestel hat Trinus syn ropping mist. Hy hie terrorist wurde wollen.

Alles wat him hillich neamt, dêr moast er oant no ta neat fan ha, mar Trinus hat him bekeard ta de Hillige Oarloch fan Bin Laden en syn kamikazepiloaten: ‘Ik ha in grut respekt foar sokke lju, ik soe it yn gjin hûndert jier doare. Moreel haw ik dêr eigentlik helendal gjin muoite mei, ik gun de Amerikanen fan herten in tebeksetter.’ Ekstremisten? Helden! Roazen ferwylje, mar Trinus Riemersma net. Dêrom hat er my telepatysk it folgjende fers taskikt:

yn Haifa of yn New York
os ik wist dot hja mei un oere stjerre mwasten
wot soe ik dwaan?
Dineke waskôgje of de plysje?
de kronte belje of it kabinet?
nee neat fon dot ollegjerre
ik gun se fan herten un tebeksetter
dot soe ik ek noch wól rus úthelje wólle
os ik net sa'n skytsek wie

meskjin soe ik even yn 't tún sjen
ot ut gês ol ópkómt
en nei Lemstra rinne óm un kroket

dur is mij neat yn 'e wei

Sjoerd Bottema