Trotwaer. Jaargang 33

[p. 435]

Arjan Hut
Nij ferlet oan âlde dagen

It is freedtejûn, mar gjin ekskuzen
We lizze mei in nije sigret yn 'e mûle
Midden op 'e dyk
Foar de âlde kroech oer, fol nij libben
Nije gesichten, farsk bier yn âlde glêzen
Gouden gloede achter de ruten
En damp fan swit en azem

De waarme wale fan dizze tiid
Lit ús de jassen binnen hingje
En sa hâlde we in eachje op 'e fytsen
Sa't se der no noch steane

Op 'e flechtheuvel lizze wy, sigretten oan
De oerwurken syngroan, omheech eagjend
Nei de myriade fan stjerren
Tusken de wolken troch

Sykheljend, rêst en reek
Jûnswille en frijheidslucht
Wurdflarden en flearmûzen
Auto's yn de fierte, links en rjochts
Wy hâlde ús fuotten yn

Do en ik
Wachtsjend op 'e tongerbui
Dy't stadich dizze kant út krûpt
Earst dan sykje we ús plakken
Binnen yn it ljocht wer op
It is freedtejûn, mar gjin ekskuzen
Gjin ferlet dêrfan