Trotwaer. Jaargang 31

[p. 325]

[Nummer 7]

Dwersreed
Henk van der Veer

In grutte kâns dat jo de hege temperatueren fan de ôfrûne simmer al lang wer ferjitten binne. Hawar it is no (02.08.99) machtich moai waar en ik genietsje fan lange dagen en fakânsje, gjin dwersens yn 't sin en sadwaande giet de gjalp ‘ynspiraasje út argewaasje’ hielendal net op foar my. Mar hoe sit dat no mei dy dwersens by oaren yn it Frysk literêre wrâldsje (=stip)? De nammen mar ris bydel, yn omkearde folchoarder en neffens eigen persoanlike kar, sa dwers bin 'k noch al. En as't moat wol ik guon ek noch wol eefkes fergje op it ien of oar.

Zwaga, Ulbe. Hat gjin bliksem mei de Fryske literatuer te krijen mar is sa dwers as in bos sipels. By de priisútrikking yn Snits sei de Ljouwerter skûtsjeskipper û.o.: ‘It SKS-bestjoer moat bestjoere, de sjueryleden moatte de eare oan har sels hâlde en opstappe, in soad wedstrydkommisjes moatte in kursus wedstryd útlizzen folgje en de sylried misbrûkt syn macht.’ Spitich dat de winner fan it SKS-skûtsjesilen 1999 gjin skriuwer is.

X, frou. By de letter X komt my noch altyd Tiny Mulder yn 't sin. Jierrenlang skreau Tiny Mulder kritise stikken foar it Friesch Dagblad. Mar alles alles geht vorbei en Tiny Mulder skriuwt spitigernôch al skoften gjin kritiken mear foar it Deiblêd. It soe oars gjin kwea kinne as Lútsen Kooistra syn literêre redaksje ris achter de fodden sitte soe, benammen mei it besprekken fan Fryske boeken rint syn krante achter. De FD-kollums fan Klaas Jansma hawwe oars in heech dwers gehalte!

Yedema, Piter. Is blykber noch altyd lulk op it bestjoer fan de KU en wegeret sadwaande mei te wurkjen oan Trotwaer. Kom op Piter oersljochtsje dy hannel, dyn stikjes foar de LC-multy-nasjonal, binne de nuete kant it neist.

Wiersma, Syds. Liket fan 'e ierdboaiem ferdwûn, om noch mar te swijen fan it Frysk literêr poadium. Soene de resinsinten dizze jonge Fryske dichter deaknuffele ha? Syds waar zijt gij?

Veenbaas, Jabik. Resinsint, dy't neffens Steven de Jong ‘syn lege holle brûkt om nei boppen te slikjen [...] en nei ûnderen ta te traapjen’. Lykwols yn syn antykrityk op De Jong bliuwt Veenbaas in boerzois-jonkje en reagearret er hielendal net dwers: ‘...ik stel wol fêst dat de flymskerpe polemikus Steven de Jong min oer krityk kin.’ In kristlike wraaknimmer, dizze Veenbaas.

Ultra's, Binne der by myn witten net yn 'e Fryske lettertún, mar ik kin my fersinne!

Terpstra, Piter. Hat net mear de leeftyd om alle dagen dwers of lulk te wêzen, mar wie wol sa eigenwiis en wegerje noch net sa lang lyn mei te wurken om syn namme op in strjittenammebuordsje te pleatsen.

Speerstra, Hylke. De âld-LC-haadredakteur mei graach oer dwerse skippers, keatsers en reedriders skriuwe. Mar hy is út noch yn gjin literêre djipdoller. Watte, hy reizge dizze simmer mei in VIP-bus fol Fryske hotemetoten nei Dútslân om dêr oan ien fan Fryslâns grut-

[p. 326]

ste pommeranten, Wim Duisenberg, it earste eksimplaar fan syn nijste boek, It wrede paradys, te oerlangjen. Nee, nochris gjin dwersbongel dy Speerstra.

Riemersma, Trinus. Mei syn seis krúskes op 'e rêch sa stadichoan in angry old man. Der waard oait oer him sein ‘oans Trinus het un hekel an gedonder, mar hij kin noch minder sonder’. Sterker noch hy skreau ris ‘ik haw in hekel oan minsken / dy't net fan gedonder hâlde / sokken krij ik altyd / gedonder mei’. Stiet noch regelmjittich op 'e achterste poaten en doopt syn pinne yn 'e jittik. Sjoch de rubryk ‘Altyd wat!’ yn dit blêd.

Q, de. Utjouwerij fan QuizeQuânsje dêr't it op dit stuit eins te goed mei giet om dwers te wezen. Hat sûnt dizze maityd in nije foarsitter yn 'e persoan fan Doeke Sijens, in skriuwer dy't yn syn Dwersreedstikken noch alris dwerse kneppels smyt. Dat wa wit.

Piebenga, Tjitte. Guon lju út it Frysk literêr fermidden (Jan Kooistra!) kinne it bloed fan dizze LC-poëzij-resinsint wol drinke. Piebenga mei de lju graach ris dwers tsjin de hierren ynstrike, mar as ik myn sin sis: Tjitte Piebenga is sa goed as bôle, eins te goed foar dizze wrâld. Soe ris in polemyk yn Trotwaer begjinne moatte, mei al dy sabeare Fryske dichters.

Oppewal, Teake. Wie, mei Pier Boorsma, sa dwers om gjin fersen fan Jelle Kaspersma yn de Spiegel van de Friese Poëzie op te nimmen. Ha ik dêrnei noait mear betraapje kinnen op dwersbongelerij.

Noordmans, Jacob. Dizze man is sa dwers, dat er it sels, wat slimmer is, syn lêzerspublyk, net iens mear yn 'e gaten hat. Elke sneon weroan preket er dwers tsjin de ‘ontkerstening’ fan Fryslân en de wrâld yn. Mar wêrom yn de goedichheid docht er dat yn in tale Kanaäns (=Hollâns)? Dwers?

Miedema, Baukje. Feroare har (skriuwers)namme yn ‘Bauky’ Miedema om in resinsint, Anne Wadman, ris hearlik de gek oan te stekken. It is de lêste tiid fierste te stil om Baukje hinne. Trotwaer ferskynt no tsien kear yn 't jier Miedema, skriuwe blinder, it ‘Trotwaer-toaniel-poadium’ is foar dy! Om mar ris in dwerstrjitte te neamen.

Leest, R.R.R.. It kaam by him net op ien R mear of minder oan. Mar hy stiet blykber sa fier boppe de Fryske skriuwerij dat er net iens mear mei docht. Tsja...

Klazinga, Bertus. Hy wurdt dwers as bobo's har mei syn kreative toko bemuoie. Sjappo Bertus!

Jong, de Steven. Stiet op dit stuit mei stip op numer ien yn 'e Frysk Literêre Dwersbongelers Top Tsien. Foar mear ynformaasje ferwiis ik graach nei it foarige nûmer. Voorwaarts Steven!

IP2r90, Rendez-Vous. Literêr Frysk polemysk tydskrift fan Josse de Haan, dat spitigernôch in sêfte dea stoarn is. Ik zeg U sta op Johannes, neem de pen ter hand en veeg er nog eens in!

HHispel. Utjouwer fan it Frysk literêr Tydskrift Hjir, it tydskrift dat altyd in moanne letter ferskynd as op it omkaft stiet. Dat is lekker dwers.

Groot, Pieter de. Dwers yn 'e baas syn tiid. Is dat ek dwers?

[p. 327]

Feddema, Anne. Un folbloed autintike Liwwarder, dy't dwers tsjin alle wenstige Fryske poëzijskriuwerij yn giet. Net te stuitsjen, sels net troch gelearde Frysk literêre advyskommisjeleden. Der plat foar dou inwoaner fan ‘ut klompehok foar de hel’! (De lêste kwalifikaasje oars mei dank oan Steven Hotse Piter de Jong.)

Eeltsje, Hettinga. Hat him foar alles wat fen is fan Trotwaer ûnstjêrlik makke troch de redakteuren fan dit blêd te ‘betichten’ fan en ik skriuw it mar eefkes mei kapitalen ‘FER-STRIKELING’. Mar it hat no lang genôch duorre om dit blêd te boycotten Hettinga. Soks is net mear dwers mar lytsbernich.

Dam, Eppie. Dizze swier ûnderwurdearre skriuwer út Balk komt net foar op 'e ledelist fan it Skriuwersboun. Dwersens of skoalmastereftige (o.k. skoal‘meester’achtige) sunigens? Dam is oars in earsteklas dwerslizzer en dat net allinne as it giet om de stavering yn Fryske berneboeken. Jou dizze man asjeblyft noch net in Gysbert Japicxpriis, in priis dy't er oars al lang fertsjinne hat. It nije milennium telt noch genôch kânsen. En sa lang as Dam de heechst Frysk literêre ûnderskieding noch net yn ûntfangst nommen hat sil er argewaasje hâlde. En wa sei ek al wer ‘út argewaasje helje ik ynspiraasje’?

Cornelis, van der Wal. Yntrodusearre him as meiwurker oan dit magazine ris bluisterich as ‘terrorist te Grins’. Hat sûndermis in dwers poëtys lûd, it wachtsjen is op syn folgjende bondel. Is it hast safier Knillis?

Bralts, André. Dat de Strikel net mear ferskynt is miskien slim foar de eks-redaksjeleden (weiwurden yn it swarte literêre gat fan Fryslân) en fansels foar al dy eardere lêzers. Mar it alderslimst fyn ik dat André Bralts mei it ferskieden dit ‘Moanneblêd foar Fryslân’ de pinne foargoed dellein liket te hawwen. Jeuminikkus, wat koe dy fint dwers wêze yn syn ‘Koartsein’-stikjes. Ien fan syn ‘slachtoffers’, Tony Feitsma, hinget leau 'k noch altyd yn 'e gerdinen.

Abma, Willem G. Bliid mei 'k nijs dat der wer in bondel fan dizze âld-Folsgeaster dichter útkommen is. Mar is fansels mear as dwers dat er him noait mear yn Trotwaer of om myn part yn Hjir oppenearret. In man mei dyn kapasiteiten soe de flier oanfeie moatte mei al dy lju dy't dwersferkeard mei dy wolle Willem! It mes dwers yn 'e bek en traktearje de hiele Fryske literêre incrowd op dyn skriuw-produkten Abma!