Trotwaer. Jaargang 31

[p. 71]

Tsjits Peanstra
Healbroer

Gjin bruorren en gjin susters, do kaamst letter.
Yn hûs de swietrook fan it tatebern
en lûden dy't al lang fergetten wiene,
in lichte oergeunst kleure alle nij

en letter ris tegearre op 'e foto
do, boerejonkje yn in overal
wy sochten allebeide oare wegen
ferlearen wat ús goed en eigen wie.

No't w'yn de neitiid fan it libben steane
is it as ha wy hast gjin oere mist.
Wy stean by 't hûs, it hiem dêr't wy doe boarten
en 'k wit foargoed hoe nei asto my bist.