Trotwaer. Jaargang 31

[p. 58]

Jan Dotinga
Ik bin in famylje

Soe 'k witte kinne wa't ik bin,
sûnder dy kend te hawwen,
Melle Dotinga?

Dyn mankrêft doe'tst my as jonkje
op 't skouder tildest en op
souderhichte brochtst,
dyn leafde oer de hikke as 't hynder
wrinzgjend ta dy kaam, de ko
dyn streakjen slikjende begroete

Dyn ynset boppe en ûnder wurgens út,
foar skoalle en tsjerke en dat
nei melkerstiid en leafst by 't ljochtsjen
fan 'e moanne

Dyn bidden mânsk fan formulearring,
leard op feinteferiening yn opstel
en petear oer tsjerke, steat en maatskippij,
stadich ranend yn in skeamel ik
tsjin de Alderheechste oer

Dyn sleinens doe't in Jeltsje dy ferstoar,
dy'tst droechst yn hert en hannen -
en dyn leauwen blette

Dyn flechtsjen yn in swijen
nei in ‘do hâldst it mei de bern’,
by twadde houlik om brea en oarder
yn gesin

Dyn skreppen om siken
yn 't lichaamlike en yn ‘de teare omgong
mei de Hear’

[p. 59]

 

Dyn lêste smook út in sigret dy't hja

 

dy yn 'e mûle hold, wylst in ‘skreefke ljocht’

 

dy barre mocht

 

 

 

Soe 'k witte kinne wa't ik bin,

 

sûnder dy kend te hawwen,

 

Jeltsje Barwegen?

 

 

 

Dyn tsjinstberens as grutfaam

 

op Sybrandy's pleats, skreppend foar oaren

 

en minlik bliid mei minsklikheid

 

 

 

Dyn leafde skruten iepen tearend

 

op 'e bûthúsbank, neist him dy't wist

 

datsto it wiest

 

 

 

Dyn jaan om syn betrouwen, syn witten

 

en syn wissichheid, om syn hannen dêr't de groeden

 

yn ta tagediene tekens waarden

 

 

 

Dyn lichem dat út tekens groeide

 

en nije namme út âlde joech

 

yn suver jierliks dragen

 

 

 

Dyn wêzen dat geduld yn sizzen, soargjen

 

lei oant datst it stjoer kwyt rekkeste en hommels

 

tusken wein en hynder foelst

 

 

 

Dyn ein net witten en net wollen noch,

 

yn 't Stedssikehûs ûnder de lûden fan rôljend bus- en

 

frachtferkear

[p. 60]

 

Ik bin

 

 

 

syn âld fioele op 'e bûthússouder

 

by 't boartersguod syn ocarine,

 

syn skiednisboeken O.L. Veerman en De Liefde

 

Romkes ‘Werelddelen’,

 

syn wissichheid yn twivel

 

syn twivel yn wissens

 

 

 

har argewaasje om lijen en om skeel

 

har leaver stil betsjen en ôfwachtsjen

 

har ‘Avondlied’ by 't petroaljestel

 

 

 

Ik bin dy Tseard, dy Mary en dy Andrys,

 

dy Arjen, dy Eelke en dy Jantsje,

 

dy Tine en dy Hindrik

 

 

 

Ik bin in famylje