Trotwaer. Jaargang 30

[p. 267]

Eric Hoekstra

Billy Budd: tsjinstfaam en kening fan 'e see

Hy wie de tsjinstfaam en de kening
fan 'e see, altyd ree
en klim yn it want en
lavearje om de kante
spierde balken fan it krús
en bekken fan 'e mêst,
en reevje de rokken fan 'e seilen.

Hy wie de tsjinstfaam en kening
fan 'e see, reewillich
klaaide er him yn it blau
matroazebaai, en draai
de touwen tsjok as ieren
om 'e stam fan 'e mêst
ferburgen yn 'e rokken fan 'e seilen.

Hy wie tsjinstfaam en kening
fan 'e see, steesoan
naam er oarmans wurk oan
en sifere himsels wei
en sa hearske er oer al syn
maten: de roas op it deade hout
fan 'e strewellen fan 'e dei.

Mar ien woe gjin gedoente
mei de skientme fan syn tsjoen
en sloech him mei syn knyft
op it krúshout fan 'e mêst:
in Sinte Sebastiaan op it lêst.

Hy wie de tsjinstfaam en de kening
fan 'e see, altyd ree.

[p. 268]

It militêre sels

It binne net de epoletten
dy't myn fingers aaikje,
it is net it strange unifoarm
dat myn each bekoart
of oare aspekten fan it liif,
sjoen of ret en rekreëarre:
it is it militêre sels
dêr't ik fan hâld.

Ik bin in strider fan 'e geast
en ik gehoarsumje blyn
oan it brike befeljen fan myn smaak.
Ik bin dôf foar it befeljen
fan oare mearderheden.
Ik fermoardzje de mieningen fan oaren,
fertraapje de swakke -
arguminten yn my.

It is it militêre sels
dêr't ik fan hâld
en it is it slachfjild fan myn geast
dat my bekoart.

[p. 269]

Wêr longerje jim op?

Jim tonge longert
op 'e gleonens fan in kopke
sûkelade mei rjemme
of longert jim tonge
op 'e glânzjende glêdens
fan 'e stâle fan it sulveren
leppeltsje
en wol er reedride
op it spegelglêde iis
fan 'e rêch en it bolle biltsje
oan 'e achterkant
of spegelje him yn 'e blide
holte oan 'e foarkant?

Wêr longerje jim op,
op it leppeltsje of op 'e sûkelade?
Wonderlik is it longerjen
fan jim tonge.

[p. 270]

Allinne

Ha jo myn DNA ek sjoen,
it stie hjir yn dit potsje.
Faaks hat de skjinmakker him fersjoen
of it meiroeid foar syn katsje.

Ik sykje yn 'e skappen om,
se hiene my krekt kloond.
Hoe fyn ik no mysels werom?
Nee, ik bin net stoond.

Ik sykje yn 'e supermerk,
ik sykje yn tsjerke en studio,
ik sykje yn 'e krante want
sûnder it keurmerk fan dit oard
bin ik allinne preludio
op myn eigen soart.