Trotwaer. Jaargang 30

[p. 83]

Tsjisse Hettema
Hingje

ik haw in sniehûs boud
op in krúspunt fan fjouwer wetters
en nei elke sleat
in rút úthoud
fjouwer fizy's foar letter

falle gear yn myn hert
in flechtwei om better
sicht te krijen
op myn sniewite ûnskuld

hingje oan fryslân
hinget it my op

dêrom haw ik reade brieven stjoerd
kin neat skele
wat
dêr leit myn hert
yn
ferskillende sluven
gearfoege
ta in waaksen palet
in skraal
kleure ferlet
plak de postsegel

rjochts

tsjin 't gesicht

is dat sniewite plak oan 'e muorre
dan wol op wiere grutte útsnijd?

it reade gesicht
dêr tsjinoan flijd
op ligen hifke
en de fjouwer fizy's foar letter
flybket even in iisspegel