Trotwaer. Jaargang 29

[p. 16]

Eric Hoekstra

De floeibere bân

It is de floeibere bân dy't ús bynt
at de jûn ús op it Saailân fynt
en we dronken rêch oan rêch de stjerren telle
mar neat ha om mei te beteljen, it
paad fan 'e bierloaze dief betinke, it
brike geheim dat ús bêdet, it is
de floeibere bân dy't ús bynt.

It is de floeibere bân dy't ús bynt
at de nacht ús mûlen leech slynt.
Troch glûpske strûpen yn it skom
sobje we op de sidesêfte
barchjeblommen om, we ferteare
wat we eare en oarsom: it is
de floeibere bân dy't ús bynt.

[p. 17]

Op it nachtskip

Ik ha it hea yn 'e skuorre
riden en de skuorre fannacht
ferstjoerd nei de West
en my derby; it skip
fike blauwe krassen yn it iis
en de stjerren glieden by de hoannebalken del,
sprongen it hea yn en trouden
mei de blommen. De roazen
dûnsen it foardek op en del
en wonken nei seelju mei broeken
fan flewiel en himden fan rip
en ringen yn 'e earen
dêr't de slangen troch krûpten
en har gif ferlearen.
De narsissen hongen oan 'e fokstôk
fansels, ta eare fan harsels.
De god rûn it foardek
op en del en biet
yn 'e apels, aaike blêden;
hy lake doe't de tigers
him besprongen en stapte
troch it giele gat fan 'e moanne
yn 'e himel. Dy fallende
stjer is syn: -
boarne.

[p. 18]

Boarne

Ik soe te iten
yn it Hilton hotel.
Ik siet knap yn 'e klean
en goed yn it fel
en mear as dat,
mei in aardige faam,
dy koe 'm wol ha,
ik koe it net op,
Myn Gelok, we hienen
oesters en fisk, gjin bonkjes
(dy earsten) gjin skelpkes
(dy lêsten), we frieten
kelp by it tobfol,
echt wier bioatysk
en hienen in wille
by it byfstik, iroanysk.

Earst lei der iis yn 'e grêft, letter
fûnen we snieklokjes by de oar yn 'e mûle
en bellen fan lucht en in rea fornús
en in sifeljende slange fol wetter.

[p. 19]

It segel fan 'e macht

Jou my in ûnbeweegber hert
in hert fan stien, in brânkast
dêr't it kapitaal yn tanimt
en it frouljusfolk omhinne rint
mei eangst yn 'e eagen
en de gruttere wil
te leauwen yn it bakte byld
yn de reade ûn.

Jou my in ûnbeweegber hert
in hert fan reade bakstien
in hert fan wyt semint
dêr't de hier fan te heech
wurden is en foar myn fans
in hûs fan âlde kranten
en in tonge foar it slikjen fan myn wanten.

Jou my de pauselike ring
jou my it segel fan 'e macht
jou my it allerhurdste ding:
in ûnbeweegber hert.