Trotwaer. Jaargang 28

[p. 66]

De jachtfrou
Albertina Soepboer

I

Sy dwaalt troch de bosken, no allinne,
mar sykjend nei bloed dat streame moat.
Under har fuotten kleuret grûn fierder
no't it swart himsels tichterby bringt.

Neam har net. Silst dyn tosken op har
stikken bite. Lis har del op 'e grûn.
Lit har komme sûnder wurden. Under dyn
liif skimert se fuort ta grizer skaad.

II

Do wennest yn 'e bergen, tsjoenst read
yn 'e wyn. Dy dei waaie de luchten fan
de slachtmoanne foarby. Noch witsto neat
fan wat har djip yn 'e grûn beweecht.

Oant sy hongerich tusken dyn beammen stiet,
wurdleas toant wa't se is. Sjochst har.
In feloranje flam dy't noch net rekke is.
Silst dyn mûle iepenje. Swijst en swijst.

[p. 67]

III

Mar do neamst har. Har liif sjit as gleon
skaad tusken de beammen, flammet nei mear.
Ferhaalst in ferhaal fan bloedwyn, dat it
heger is as dyn alderdjipste mearkebergen.

Stream fan wurden rôlet de nacht yn, sweeft
troch de tunen hinne. Se lit har betsjoene,
fertelst har fierder fan hûs. Oant se baarnt
en baarnt fan 'e tûzend nammen dysto seist.

IV

No komt watsto net sjochst. Har honger net,
har hytte net. Bûchst har net del nei de grûn,
nee, do litst har braak lizze. Har lân hat
net de spoaren fan wyld sied dat boaiem fynt.

Hoe moat sy fertelle fan karmyn dat seeblau
kleuret, hoesto har iepene hast en it tij
fan 'e moanne har troch it liif streamt. Sa
is seeblau, sa stilblau, oant it kantelet.

[p. 68]

V

Sy keart har om, pakt har sels op at
it jachtwaar wer komt. Do hast har gjin
frucht setten. Har rêch stiet heech by
de wyn op. In glimp fan skarlekkenread.

At se dy sjocht, sil se dy op 'e grûn
lizze. It bloed moat streame. Gjin wurd
sil se noch fan dy leauwe. Ut dyn brune
grûn sil se rûch rispe wat har takomt.

Epilooch

By ôfgeande spoekmoanne moetet in frou
in man. Om har hinne lizze fruchten fan
in lang seizoen. De grûn bûcht fan har
swierte, ûntfangt sied foar nije bloei.

Sis net datsto it net sjoen hast. In mes
snijt hast rapper as ljocht en wa bûcht net
foar de ierde? Neam my net asto my sjochst.
Dan sil ek de jachtfrou har rispinge fange.