Trotwaer. Jaargang 28

[p. 33]

Jir̂í Wolker:
De feint foar it finster
Douwe Tamminga

Jir̂í Wolker (1900-1924), Tsjechysk dichter, ferliet syn âldershûs yn Prostejov, in stedsje yn Moravië, doe't er njoggentjin wie, om yn Praach rjochten te studearjen. Dy stúdzje joech er moai gau op, om him alhiel opliterêr wurk ta te lizzen. Yn 1922 begûn er him mei polityk te bemuoien en waard er in oertsjûge kommunist. Yn 1921 en 1922 binne yn syn memmetaal twa dichtbondels fan him ferskynd. Noch mar 24 jier âld is er oan longtarring weirekke.

Oersetting nei it Dútsk.

Café Bellevue, honk fan woldijen,
fol soelens, muzyk en snypsnaarderijen,
fergulde balústers, fol plúster en pracht.
Bûten de hjerstrein, de skrouskens, de nacht.
Finsterglês speeg'let dêrtuskenyn:
hjirsanne waarmte,
dêrsanne wyn.

As jimmer is hjoed wer eltsenien kommen,
deftige hearen, opmakke mefrouwen
hawwe behaachlik har plakken ynnommen,
noazelje nei wat in nijsblêd ferkrantet.
Hja skouwe
mei têde
tefredene blikken
- briljanten op strikken -
de rôzige wrâld en fertier,
troch harren lorgnetten fan krantepapier.

[p. 34]

 

Sa't se mei leeljeblanke hannen

 

earber en sêd yn 'e soelte oansieten,

 

nipten fan mokka, swietekau ieten,

 

lit dêr ynienen

 

ûntstean alteraasje

 

in healwoeksen jonge, in mitich persoan

 

parse syn skriele úthongere faasje

 

pal tsjin it bûtenste finsterglês oan,

 

 

 

om as mei earnseach de skied te ferbrekken

 

en yn dy weelde wyld óm te stekken,

 

yn spegels, yn tressen,

 

yn 't plús, yn maîtressen,

 

yn fette en grou folfretten pânsen,

 

har rôljend yn waarmte en ljochtgeflonker -

 

om hingjend te bliuwen

 

oant lang al yn 't donker

 

de feint foar it finster weiwurden wie.

 

 

 

Doe wie't oft de rigen moarmeren tafels

 

hommels ferskaaiden

 

ta farskdolde grêven.

 

Lang deaseine hearen,

 

fermôgele mefrouwen

 

kamen

 

laitsjende ta de seale ynskowen.

 

En de obers, yn swarte roudracht stutsen,

 

droegen krânsen oan mei lang útrutsen

 

linten fan reek. -

 

Bûten op strjitte, oare kant glêzen,

 

hearske de needdruft, de weedom, de rein,

 

binnen, al wie it dêr deadsk en beferzen,

 

tûlkjen en laitsjen namen gjin ein.