Trotwaer. Jaargang 26

[p. 263]

Albertina Soepboer

Drowning by numbers

Drowning by numbers is in film fan Peter Greenaway dêr't de dea in sintrale rol yn spilet. Trije froulju ferdrinke om ferskillende redenen harren manlju. De dokter dy't de deaden ûndersykje moat wit dat, mar wol der neat oan dwaan omdat er bang is foar harren wraak. Underwilens falle de deaden by boskjes: fûgels, kij, fisken en gean sa mar troch. In jonkje en in famke telle al dy deaden as wie it in spultsje.

By Greenaway is it libben net mear as it ôftellen fan de dagen. De nûmers foarmje it systeem dêr't it yn it libben om draait. Oan 'e ein fan de film ferdrinke de froulju ek de dokter dy't ommers fierstentefolle wit.

Yn it fers Drowning by Numbers ha ik my ynspirearje litten troch dizze fassinearjende film, dat ik soe sizze: wolkom yn it makabere universum fan de nûmers.

[p. 264]

Drowning by numbers

‘Ien. Twa. Trije.
Ik sil dy wol krije.’

Sjongt it famke mei de frissels
en heint fjouwer, fiif, seis de dea
yn it ritme fan har toudûnserstou.

[p. 265]

Nûmer Ien

As in apel dreau ik
om yn dyn smoargens.
It wetter wie it helder
blau al lang kwyt.

It wie sa maklik.
Ferdrinke mei inkeld de flinters
op 'e muorre as tsjûgen.

Nûmer Twa

It lûd fan fuotten draaft by de floedstripe lâns
de lokrop fan blaugriengriis wetter
dyn holle noch ien kear yn 'e brâning.

Myn heupen, einlings sêd,
steane stevich yn it sâlte
myn langstme blust yn hege weagen
dyn earms slop neist it lichem.

[p. 266]

Nûmer Trije

Ik bin de swimster fan it djipblau
meitsje my de bewegingen fan wetter eigen
ferlies de eangst oant ik sink, sink
yn dyn te grutte wurden.
Dan nim ik dy mei it wetter yn en lit
dy sinke, sinke.

De Nûmers Fjouwer

Dy middei leinen se samar
op it strân. Happend
nei wyt ljocht. Wy seinen
neat. Fansels net.
It wiene inkeld fisken.

[p. 267]

Nûmer Fiif

It famke is grut wurden, har hier
hinget net mear yn frissels oer har
skouders. Yn it toudûnserstou hingje 94 deaden.

Nûmer Seis

Wy binne de trije furieuze graasjes, farre mei dy
oer it swarte wetter, gnize om dyn eangst
en do, do hast gjin ferwar, do wist al
fan it stadige sinken en fan de rivier dy't
dy opnimme sil yn de brede bêding.

Do witst it, it wurdt drowning by numbers.