Ingwer Esmarch
Jü schruk hån
Dåt oi läi roui önj dåt uuk neest üt fooder. Et wus en brün oi än jü hån kiiked tufreese aw har oi, wat jü duch ma hu möite läid häi. Jüst sü as da oudere fiiw, wat deer ål önj't neest läin. Jü häi har en stää ütseecht, weer di böre har ai fine köö. Ouers di hün, deer muurst jü aw for pååse, wan üt dadeer oie nuch iinjsen schüklinge wårde schönj. Di grute hün köm oofting iinjsen döör e låås än häi har uk ål iinjsen heer äädern önj e jarn uner e hautjarscher sänj, as jü önjfångd wus har neest tu bägen. Ouers deer häi's sü dänj as wan jü eefter hu kjarle seecht än häi tusänj, dåt's huuch aw't förderbiinj fluuch as hi har tu näi köm. An as jü eefter dåt süst oi kiiked, wat deer nü sü roui made da oudere läi - joo, jü kånd ark änkelt foon har oie - deer feel har in, hü jü uk di böre forn geek hülen häi. Hi häi arks hån aw e löör, wat har oie ai önj da deerfor bägede nääsde läid. E hiil nåcht häi's ålten aw har neest sin än en oi ütbreet. Deerbai häi's knååpenooch släip füngen, dan di däiouer sätj's dan aw't oieneest än breet ma da oudere håne. Dåt süst oi wörd önj e nåcht for poosche tuläid.
Seeks nåchte suner släip, dåt wus for en hån wat ai wise muurst, dåt's schruk wus bål wat foole. Jüst nü tu poosche weer e börewüf eefter ark oi üt wus. Ouers jü häi har dåt fåst fornümen. Jarling wälj jü har en floose schüklinge ütbrädje. Ma dåt deer müülj kiiked jü nuch iinjsen eefter har seeks oie än lüp dan trååt ouers duch luklik tu dåt hånehuk tubääg, dan e krädjer häi ål kraid. Di latje gååst häi ham ål deegelung aw dåt poosche oie säken froid an iiwri kiiked hi tuhuupe ma sin süschene önj ark jarn önj e låås. Et häi rind än deeram wus di pooschehååse önj e låås wään. Mör üt tufal fün di latje gååst dåt neest än muurst åål da oie behüülje. Joo, hi muurst ja segoor seelew fårwe.
Auteursrechtelijk beschermd