Sönnich Volquardsen
Di 75. iirdäi (fragmint)
Al sont jül häi 's deer al toochte am maaget än ploonet, hüng di däi ufluupe än foor allen hum deer mäskuil. Sü grot kööj dat sjilskäp ja ai mur wuode: hären muon lää al sont 47 iir oon jugoslåwien, än fuon här 4 söskene was bloots noch iin söster jiter. Sü häi's dä järe börne altåmarle inloid jiter Garding tå kämen, äm deer dat träifjiiring iirhonert mä här tå fiiren. Foor dä miiste was dat en groter rais, foor iintlik was här famili ja goorai heer ine. Deer was uk jü ‘grot’ politik skil tå. Wät en döörenoor was dat dach:
Hären aaltääte was boine ween oon Rüpel (= Rudbøl / Ruttebüll) bai e Wiedau an snaaket miist bloots dårnsk. San aalste sän saand'er oors mä 14 iir oon pensioon ta en skulmeerster oon Dithmarschen, aardat di gårst mä dat deer tjüsk, wät'er oon't Rüpel'er skool liird häi, bifdjiter wäl ai bestoine kööj. - än Tjüskloin was e tåkämst, ökonomisk än politisk, dat liiwet di tääte hiil fast. Sin biiring dringe naamd'er ai mur äp jiter järe aaltäätene (süng äs fuolk dat iirtids altens deen häi), nårn, jä fingen noome fuon Hohenzollern-prinse Fritz än Wilhelm!
Auteursrechtelijk beschermd