Trotwaer. Jaargang 24

[p. 116]

Ingwer Esmarch
di ialtürn

54^o nordriie foon e ekwaator
8^o ååsdriie foon greenwi
striket de e win foon ååle side
draft wååder foon e wurme struum
slååder am dan fötj

önj e grün fååst haanemöret
stoonst dü pål önj rin än storm

smatst din jåcht ouert heef herüt

wan ik eefter en lungen een din blanken sii
än ål wat twiwel önj e fååste grün
dan luup ik duch liifst ap tu de
laan iinj dan briidje reek
än lätj me ma din stroole driwe
ja scheene wid inönj e junke
än duch schint me as köö ik's gripe

fleedermüs spaale döör din jåcht
än scheene as stääre
wan ja foon dåt iin påk stroole tu dåt ouder glide
sü as stäken's aw din jåcht inönj en ouder wråål