Trotwaer. Jaargang 24

[p. 75]

Vasco Cabral / Teije Brattinga

In lyts ferhaaltsje

‘Fertel my, mem, in teltsje
in lyts ferhaaltsje ...’
Goed myn soan, harkje nei in teltsje,
in lytsen, in lytsen ...

De sinne is goud!
De moanne is sulver!
De stjerren pearlen!

‘Mem, ik wol graach de sinne!’
Goed myn soan: do hast yn 't libben de sinne
asto earlik bist ...

‘Mem, ik wol graach de moanne!’
Goed myn soan: do hast yn it libben de moanne
ast fatsoenlik bist ...

‘Mem, ik wol graach de stjerren!’
Goed, myn soan: do hast yn 't libben de stjerren
asto rjochtfeardich, minsklik bist ...

‘Mem, ik bin sa slûch!’
Wol, sliep myn soan, doch dyn ...

[p. 76]

Brutaalwei

Op in dei frege ik
oan in blom yn 't strewel:
wat is dyn leafde?
De blom andere my:
myn leafde is de sinne.
Op in dei frege ik
oan in fisk yn 'e see:
wat is dyn leafde?
En de fisk andere:
myn leafde is it wetter.
Op in dei frege ik
oan in fleanende fûgel:
wat is dyn leafde?
En de fûgel andere:
myn leafde is de romte.
Op in dei frege immen my:
wat is dyn leafde?
Ik andere dy persoan:
ik ha twa leafdes
yn ien en itselde lichem:
myn folk en de frijheid!

[p. 77]

Unwennigens fan har dy't sizze farwol

Unwennigens fan har dy't sizze farwol:
in trien
dy't fladdert, fladdert
as de flecht fan in sigen

En fier
mar tichtby
it hert dat slacht en slacht ...

Unwennigens fan har dy't sizze farwol:
in rop mei wjerlûd
dat him herhellet binnen
yn swijen en swijen ...

Der is pine
sûnder pine te wêzen:
fjoer dat ferbaarnt yn 'e siel.

It is der
de fertizing
net te sizzen.
It lûd fan it wetter
dat komt en giet
en bliuwt.

[p. 78]

 

Unwennigens fan har dy't sizze farwol:

 

in trien

 

dy't fladdert, fladdert

 

as in tryste fûgel!