Trotwaer. Jaargang 21

[p. 280]

Josse de Haan

Paspoart

it smokkeljen fan myn tinzen
troch de kieren yn dyn gesicht

of

it skowen fan myn gefoel
oer de paden fan dyn skaakboerd

liket op it ferliezen fan it paspoart
foar it sykheljen yn de taal

ik wol allinne mar atlas wêze
sûnder meridiaan en in ekwator

[p. 281]

Pyrrhus nei Pyrrhus

foarby al it wetter
fan de oséanen reizgje:
efter alle nullen
yn 'e heabergen wenje:
en dan alle ferlerne slaggen
fermannichfâldigje mei ien oerwinning:

in moarn nei in swiete nacht
doe't men in sok kwyt wie

[p. 282]

Sûnder kaart

foar b.

tusken dyn teannen
dyn opstutsen hier
socht ik de kerl
fan 't witten
(ek)
yn dyn earen
eagen
noas
mûle
nâle
(ek)
doalhôven
wiisden as paadwizers
oer de lânkaart fan dyn liif

doe spjalte it tredde each
de iris fan 't bestean
yn de wintertún dy't fonkjend
teraande yn ljisk en obelisk