Trotwaer. Jaargang 21

[p. 270]

Willem Abma

fisker

in stream fan tinzen
der komme en gean
op de igge in fisker

om wat te fangen
hoecht er mar te tinken
byt hat er altyd

wat moat er dwaan
om neat te fangen
giet er oerein om te ferjitten
de stream giet mei him mei

fisker fan
hy is wat er tinkt
syn eigen fangst

[p. 271]

dichterskip

dyn fersen hawwe dy te fûnling lein
in warleas neakene poppe
net yn in smûke stâl fan Bartlehiem
folle minder noch in gloppe

ik haw dy út it ôfeart fiske
wat wie dêr net dat rotte
as wie it ûntstien út jiske
dêr lei dyn hert dat kloppe

op byldskerm yn kompjûtertaal
stiet skreaun datst biste as prosesferbaal
de reade toets en do bist wiske
de dea is soms wol tige triviaal

silsto no jimmer in fûnling bliuwe
ik haw dy lêzen wol do dy skriuwe

[p. 272]

benei

noch net ha fleagen brutsen it ferset
tsjin 't fers dat út in pinigjend ferlet
him lâns de stringen fan ûntstean
sykjend in wei brekt út syn kearn

noch rikke lûd en ritme net
nei 't fiere en ferstienne hert
wol trillet as in hifkjend lead
in wjerlûd fan foetale steat