Trotwaer. Jaargang 19

[p. 286]

Josse de Haan

Do

leafste, do sitst op de úteinen
fan de wurden
sjochst troch myn finster
begrypst de tekens

dan wer ûntflechte
skuorre se útinoar
rinne se yn 't hûndert
omdat ik dy rinnen seach

achter alle kribels hâldsto ta

no rimpelt it wetter yn 'e loft

ik haw dy nea fange wollen

hearsto
witsto
sjochsto
do

[p. 287]

Fertriet

o frou borduer my iepen

stek de nullen yn jo hier
gaspje de kleaunen oan jo billen
riuw de kralen om jo mul

tear de spikers út myn eagen
brek de swurden yn myn mûle

want nimmen sil it witte
útsein de jo yn my de ik yn jo

[p. 288]

Genesis

doesto leafste yn myn mûle
de wurden fûnst
skode it sliepend byld
de gerdinen iepen

lúsjefers spruten út harsels
ûntsprongen oan de dûns
fan it klisjee
twa hannen ynelkoar

in dúnpanne en 2 lippen
dêr't de wurden kymje

[p. 289]

Efkes thús

hear: de skulp jout andert
twa skippen op 'e brâning
lústerje: s.o.s. nei s.o.s. hear:

de eachteisters fan it oantinken
litte in tel of wat it sloepke troch

twa roeiriemen binne al genôch