Trotwaer. Jaargang 19

[p. 216]

Eppie Dam

Sybe Sybesma

dy kears
yn it flmd
dat ik it yn
jo eagen ljochtsjen seach
doe't jo in caballero opstutsen
en fersen resitearren fan catullus
ien gloede wie ik

jo ryspapieren stim
giizjend as de snaren
fan in gitaar by de hjerst
trille noch dagen
yn my nei

soms
fiel ik de bân
dy't jo my
op it skouder leine
as in oerbrêging
fan twa wrâlden
fan ferskil

jo wurden
op de drompel
de klink al yn de hân:
‘no moat ik jo adres noch ha
teminsten at ik jo noch skriuwe sil’

[p. 217]

Selskip

't wie skimerjûn
de sinne rûn leech
as nei it feest in luchtballon
de dei ferswûn mei stille trom
en geandewei wie 't strân
fan mins en hûn ferlitten

en dêr wie ljocht!

se hiene sketten om har wille hinne boud
fan oaljefetten jerrycans en pallethout
de gloed fan har gedoente meielkoar
besletten yn har lytse rûnte
sa hoeden se it fjoer
as hiene se it fongen

se seagen my
en hoden hommels op fan sjongen -
doe briek har laits de stilte as in tonger
se groeten my ta algemien fermeits
it glês omheech it wie in pracht:
gutenabend! gutenacht!

[p. 218]

Passaazje op it strân

har lûd kaam my fan achteren op
it foel my op 'e hûd as tsjokke rein
in bui fan leaden kûgels
plofte yn it sân
yn dripkjende galop
sa driuwend ritmys yn kadâns
dat elk dy't heard hie
dy hie sein: in trein!
pollepop pollepop pollepop

ik gong oan kant en hja foarby -
it wie mar krekt te sjen
hoedat har kontsje trille
mar safolste langer
sette him it triljen fuort
yn 't golle dûnsjen
fan twa merjebillen