Trotwaer. Jaargang 15

[p. *5]

Grins, 1 maaie 1983

L.S.,

By de oprjochting fan de Koperative Utjowerij yn 1970 stie de leden fan doe in feriening foar eagen fan skriuwers (en sympathisanten) dy't meiinoar de útjefte fan eigen wurk op 'e noed nimme woenen: in útjouwerij fan en foar de leden-skriuwers. Dêrta hawwe de leden in kaptaal byinoar brocht, dat de basis foarme en foarmet fan it fûns fan de K.U. Dat wie en is in foarm fan solidariteit en ferantwurdlikens dy't it mooglik makket om wurk út te jaan, dat literair of oars de muoite wurdich is. Dêr heart ek wurk by dat oant no ta minder gongber is en dêrom by oare útjouwers foar de winige doar komt.

Destiids koe der mei it oprjochtingskaptaal hiel wat út 'e wei set wurde. Yn lettere jierren waarden wy krektlyk as de oare Fryske útjouwers hyltyd mear fan subsydzje ôfhinklik. Op't stuit is sa'n ôfhinklikens net noflik; jo moatte al bliid wêze as de subsydzjes gelyk bliuwe, groei sit der net mear yn, meastal is der kâns op ‘ombûgingen’. Wy litte no mar wêze hoe't jo, achte lêzer, oer subsydzjes, it profytbegjinsel en ‘privatisearring’ tinke. Foar ús is it wichtichste dat wy - om bestean bliuwe te kinnen - ús basis ferbreedzje moatte en minder fan dy tebekrinnende subsydzjes ôfhinklik wêze wolle.

Doel fan de K.U.

Moat de K.U. bestean bliuwe, hat de K.U. besteansrjocht? It doel fan de K.U. is it útjaan, fersprieden en ferkeapjen fan Frysk literair of wittenskiplik wurk, yn it foarste plak fan de leden, mar ek wol fan net-leden. Dy leden binne meast jonge(re) skriuwers en dichters, dat fan gefolgen hawwe wy navenant in soad modern proaza en poësij yn ús fûns, mei dêrnêst fan it begjin ôf ek in goed ferskaat oan berneboeken. Wy stribje nei in sa breed mooglik fûns, ek al omt goed rinnende, in breed publyk oansprekkende boeken (dy't dochs wol oan mjitstêven fan kwaliteit foldwaan moatte) gauris it útjaan fan wat mear eksperimentele literatuer mooglik meitsje. Likegoed kinne wy yn it lytse taalgebiet dat Fryslân is de subsydzjes fan de oerheid net misse en no't wy dêr hyltyd minder op rekkenje kinne, moatte wy ek besykje it wurkkaptaal op oare menieren te fergrutsjen. Dat komt der op del dat wy ferlet ha fan mear leden dy't meiinoar soargje foar in grutter ledekaptaal en ek meiinoar in aktive kearn opleverje dy't it wurk dat foar in útjouwerij dien wurde moat, foar syn rekken nimt.

[p. *6]

Rjochten en plichten fan de leden

De leden moatte in yntree-jild betelje fan f 1000,- (nei 1-7-1983 f 1250,-) en ferplichtsje har ek om datjinge dat hja skriuwe yn it foarste plak oan de K.U. oan te bieden foar publikaasje. (Dit betsjut net dat net-skriuwers gjin lid wurde kinne; elk dy't meihelpe wol, is wolkom.) De leden hawwe rjocht op in eksimplaar fan alle útjeften en kinne uteraard op de healjierlikse ledegearkomste meikedize oer it belied van har útjouwerij.

Wat kinne jo dwaan?

It bêste wat jo dwaan kinne is lid wurde fan de K.U. Dat jout jo it rjocht fan meipraten en it rjocht op in eksimplaar fan eltse útjefte. Jo soargje dêrmei foar in grutter wurkkaptaal dat wy wer ynfestearje kinne yn nije útjeften, krekt yn in tiid dat der minder romte is foar eksperiminten (mei altyd in beskaat risiko) en it foar nije, noch ûnbekende skriuwers net maklik is om in útjouwer te finen. As jo lykwols de stap nei it lidmaatskip noch wat te grut fine, mar ús dochs stypje wolle, kinne jo jo ek ree ferklearje ta in jierlikse stipe. Wy fan ús kant sille jo dan ek geregeldwei op 'e hichte hâlde fan ús aktiviteiten en benammen fan wat der spesiaal mei it stipersjild dien is. En faaks sit der dan noch wolris in presintsje oan fêst, mar wy wolle net nei in ‘kado-stelsel’ ta. It dóél fan de K.U. moat jo oansprekke kinne.

As dat sa is, kinne jo kontakt opnimme mei de administraasje of mei de skriuwer.

Mei achtinge,

S. Sybrandy, skriuwer

Rengersstr. 17

9721 CS Grins (050-254568)

P.S.

It yntree-jild kin ek yn terminen betelle wurde, of ferrekkene mei te barren skriuwershonorarium.