Trotwaer. Jaargang 15

[p. 116]

R.R.R. Van der Leest

in seemansreis

't ôffarren út makkum wei nei madagaskar
slachtmoanne d'achttjinde fan sekstjinacht

de noardewyn boaze oan ûnder loasdunen
moai foar it lapke sa gyng it as 't spoar

dy duvelske bútslije kapers fan dúntsjerk
dústen wy bûklings út túch en kajút

it bjustere tsjustere swurk is losbrutsen
tusken jeropa en afrika's kust

d'orkaan houde grousum op ynhouten yn en
touwere rou troch teraffele tou

ûntspanning en wûnder hat ús de jûn jûn by
bûkdûnseressen fan noeadhiboe

de see as in spegel de sinne yn 't senit
stees gjin ferweech troch de bocht fan gunee

[p. 117]

 

by allemans skuorring wie kokosnútmolke

 

salve en balsem foar 't syktmegefal

 

 

 

op 't lêst dochs in fleach yn 'e rêch en ús eagen

 

seagen oer weagen sjedêr lei kaapstêd

 

 

 

út farafangana werom mei in lading

 

baalfollen nagels en dadels yn maart

 

 

 

nei togo in hopen maleur en marokko

 

skode in stower oer ús tsjok as smook

 

 

 

dat gjin fjirtjin skippen te cadiz fiif minder

 

stikken op klippen of mist yn 'e mist

 

 

 

mei lekken en brekken om kaap finisterre

 

neffens 't bestek jit oer brest nei calais

 

 

 

dan 't einleaze ein efter reinige einder

 

ein fan de reis dêr't de seine op lei

 

 

 

de tsiende fan july mei 't wiif wer feriene

 

bliid oan it miel en it liif stiiffol bier

[p. 118]