Trotwaer. Jaargang 14

[p. 303]

Jelle Krol
Reaksje op reaksje

Grins, 2-6-'82

Achte Frou fan der Fear,

Yn ferbân mei myn artikel giet it der net om

-	dat ik (fansels bûten Jo om) earst ferskate kearen oan goekunde fan Jo frege ha hoe't it der mei Jo foar stie ear't de redaksje yn oerlis mei my Jo myn artikel tastjoerd hat en dat dêrom Jo oardiel oer myn hoaskens wolris wat al te gau ta stân kommen wêze kin;
-	dat Jo De Dei is Jong ta bemoediging fan jonge froulju skreaun hawwe;
-	dat Jo Virginia Woolf leaver lêze as Iris Murdoch;
-	dat ik der tige wiis mei bin dat it der dochs noch by Jo op troch kin dat in tip fan in kritysk lêzer oanlieding is ta it skriuwen fan in artikel;
-	dat ik it ferwizen nei en it ynstimmen mei it oardiel fan Durk van der Ploeg oer De Dei is Jong (dat, sa't ik yn myn stik sei, mei gâns foarbylden ûnderboud is, en dat dêrom neffens my net wer útwurke wurde hoecht) min beskôgje kin as in ‘ferskûljen efter’;
-	dat at Jo Jo sinnen net bedjerre litte wolle, Jo mar trochgean moatte mei it lêzen fan resinsinten ‘fan namme’;
-	dat Jo gâns dingen meimakke hawwe dy't ek ferbân hawwe kinne soene mei de ynhâld fan De Dei is Jong;
-	en dat de adfyskommisje foar de Gysbert Japiks-priis 1979, nettsjinsteande de klam dy't hja by it útbringen fan har adfys leit op de wearde fan Jo histoaryske romans, it adfys jout om Jo de Gysbert Japiks-priis ta te kennen foar Jo hiele oevre dêr't anno 1979 De Dei is Jong dus ek by hearde.

It giet der om

-	dat, sa't Jo sizze, it libben yndied skatryk is oan materiaal dat tige

[p. 304]

	goed te brûken is foar it skriuwen fan literatuer, dat de ‘fantasij’ en de histoarje ek genôch stoffe leverje kinne, dat dêrta gaadlik is en dat wat my oanbelanget Jo rûnom wei sitearje of taspilingen meitsje op it wurk fan alle mooglike skriuw(st)ers om Jo eigen boek te skriuwen;
-	dat nettsjinsteande de wiidweidigens fan Jo réaksje (dy't neffens my in soad hat fan in ôfliedingsmanoevre) Jo de oerienkomsten tusken De Dei is Jong en The Unicorn, sa't ik dy yn myn artikel oantoand ha, net ûntstride en dat ik dêrom De Dei is Jong amper as in boek fan Jo beskôgje kin;
-	en dat de adfyskommisje foar de Gysbert Japiks-priis 1979 dy't yn har ferslach skriuwt dat hja ‘wiidweidich de mooglikheid besjoen hat om de nije fryske bibeloersetting fan in kollektyf ûnder lieding fan ds. B. Smilde foar de priis yn 'e beneaming komme te litten’, mar dat û.o. net docht om 't dy nije bibeloersetting net sa sear in ‘eigen literaire kréaasje’ is wannear't it bygelyks om ‘it fryske lieteboek foar de tsjerken gien hie,’ dat dy kommisje dus, sûnder mis gjin weet hân hat fan 'e episoaden yn The Unicorn dy't útholle werom te finen binne yn De Dei is Jong en dat De Dei is Jong dus ek net sa sear in ‘eigen literaire kréaasje’ is as hja faaks wol tocht.

Mei freonlike groetenisse,

Jelle Krol