Trotwaer. Jaargang 7

[p. 250]

[Nummer 5]

Redaksjoneel

Lykas al út it kolofon fan nr. 4 bliken dien hat, is Miedema Pers net langer útjower fan dit tydskrift. It faillissemint dat folge op harren finansjele swierrichheden wie ek de oarsaek fan it lette forskinen fan nûmer 4. Printerij ‘Fedde Dijkstra’ hat foar de redaksje nr. 4, printe en forstjûrd. Spitigernôch is it der by troch rekke de printkladkorreksjes fan it essay fan Sierksma yn de tekst to forwurkjen. Wij biede de lêzers hjirfoar ús forûntskuldigingen.

Fan dit plak wolle wy it personiel fan Miedema Pers tankje foar harren wurk foar ús tydskrift. Binammen mei Smit, Blekkenhorst en Henny ha wy altiten yn freonskip omgien. It regelmjittich en kreas forskinen fan Trotwaer ha hja in net ûnwichtich oanpart yn hawn.

De redaksje stiet nou sels foar de útjefte fan Trotwaer, in lêst dy't fanwege redaksjewiksel en juridyske & finansjele redenen troch har net to dragen is.

Dêrom moatte wij wer in útjower ha. Ek bij in nije útjower wol de redaksje har selsstannichheit hâlde. Trotwaer wol har net bine oan hokker rounte dan ek en ek in útjower sil it redaksjebilied oan de redaksje oerlitte moatte.

Om de eksploitaesje fan 1975 slutend te krijen biede wy de lêzer hjir in dûbelnûmer. Der is lykwols kâns dat der yn dizze jiergong noch in ekstra nûmer komt: wy komme dan dochs noch op de wenstige seis nûmers.

Om de eksploitaesje yn 1976 slutend to krijen sille de abonnemintsprizen in daelder heger moatte, sadat in studint yn 1976 f 17,50 en in ‘gewoan’ abonné f 25,- bitellet.

[p. 251]

Yn dit redaksjoneei moatte wy ek ôfskie nimme fan Adri van Hijum, dy't nei fiif jier redakteurskip miend hat syn plak frij meitsje to moatten foar ‘nij bloed’. Fierderop yn dit nûmer kin de lêzer in ‘útlieding’ fan syn hân fine. It mei fan dit plak wol sein wurde dat Adri foar guon in posityf, foar guon in negatyf stimpel op Trotwaer printe hat mei syn saneamde struktueranalyses. De redaksje is fan bitinken dat dit in goed ding west hat. Hoewolt Van Hijums' styl net altiten likefolle wurdearring foun, syn theoretysk wurk foar de fryske literatuer achtet de redaksje weardefol. Tank Adri foar al dy ûren datst' der mei ompiele woest. Ek tank foar dyn krityske en opbouwende ynbring op de redaksjegearkomsten. Dû silst mist wurde.

De redaksje hopet meikoarten yn dizze fakature forsjen to kinnen. It skriuwerskip fan Trotwaer giet per 1-1-1976 oer op Alex Riemersma, dy't foarlopich noch wennet op Groote Rozenstraat 74, Grins/Groningen. Kopij moat dus tonei nei syn adres stjûrd wurde. It útjefteplan fan 1976 hoopje wy yn it earste nûmer fan de achtste jiergong to bringen dat yn febrewaris forskine sil. Solong lêzers, in nij jier: in nij bigjin, wy rekkenje op jim!