Trotwaer. Jaargang 7

[p. 4]

Geart van der Zwaag
Fersen

Oate en de profeten

‘Wagenen zonder paarden’
spriek âlde oate út 'e plasse
doe't se op 'e Terbantsterdyk
foar 't earst in auto riden seach
en tsjin har man
Jan Jan, wy bin yn it lêst fan 'e dagen

generaesjes hawwe glimke
om oate út 'e plasse
de Van der Hoeken, de Fonken
en de Van der Zwagen
feansterfyn en skânsterfyn

mar as ik hjoeddedei
om my hinne sjoch
tink ik wolris
se krije noch gelyk
oate en de profeten

[p. 5]

Camping fol

ik kom op lette jountiid oan
en mynhear de bihearder op bêd

myn tinte moat hjir ek oerein
en de skearlinen kruse mekoar

it grounseil útspraet yn 'e nacht
de linen hwat mear nei foar....

jezus kristus klinkt it út in walker

ik haw in minske oan 'e ierde neile
de harring sit ûnder it bloed

[p. 6]

Triptyk

ik foun in skulp op 't stille strân
hy woechs my út myn bernehân
waerd my ta fartúch - nou op sé
hear ik soms fierwei lûd fan lân

ik ha de seilen heger set
om bar in flok en in gebet
skuor ik de skoaten stiver oan
sà sil ik sile of net

it libben is in twariemsskou:
inkeld hwat meislaen, hwant sa gau
stou taestest nei de greate riemen
rekkest fan koerts en ritme ou